Мойеснинг МЮдан кетиши учун 31 сабаб (1-қисм)

The Telegraph нашри Мойесни истеъфога чиқариш учун 31та сабаб топиб берди.

Умумий сабаблар

1.   Премьер-лиганинг амалдаги чемпиони ва энг бой клублар рўйхатида учинчи ўринда бораётган “Манчестер Юнайтед”:

– Англия чемпионати турнир жадвалининг еттинчи ўринида боряпти. Сўнгги 24 йил ичидаги энг паст кўрсаткич;
– Ҳеч қачон Англия Кубогини ютмаган “Суонси” уни ушбу турнирдан чиқариб юборди.
– Ҳеч қачон Лига кубогида “Юнайтед”ни енгмаган “Сандерленд” манчестерликларни ушбу мусобақадаги юришига нуқта қўйди.

Содда қилиб айтганда, бу – парокандалик.

Умидсизлантирувчи статистика

2.   2013 йилнинг 28 март кунига келиб, у АПЛ турнир жадвалида энг яқин таъқибчисидан 15 очко илгарилаб кетган ҳолда 74 очко билан пешқадам бўлиб турганди.
 


2014 йилнинг 28 март кунига келиб эса жамоа 54 очко тўплаб, 7-ўринда бормоқда ва етакчидан 18 очко ортда қолмоқда.


 
3. 51 очко – Прмеьер-лига тарихидаги жамоанинг энг ёмон кўрсатгичи. Мавсумнинг шу палласигача МЮ ҳеч қачон 60 очкодан кам тўпламаганди.
4. МЮ ўз уйида “Норвич” ва “Халл”дан ҳам камроқ очко тўплаган (21).
5. Премьер-лига доирасида “қизил иблислар” турнир жадвалининг сўнгги поғоналарида бораётган “Кардифф” ва “Фулхэм” билан бир хил миқдорда гол урган (18та).

6. Мойес амалдаги чемпион билан, ўтган йили “Эвертон” билан кўрсатган натижаларидан кўра ёмонроқ кўрсаткич намойиш қиляпти.

ТАКТИКА

7. Мавсум аввалида Юнайтед Фергюсон кетганидан қанчалик қийналса, “Эвертон” ҳам Мойеснинг кетишидан шунчалик жабр кўриши тахмин қилинганди. Аслида эса Ливерпуль жамоаси янги даражага кўтарилди.
Роберто Мартинес бошчилик қилаётган “Эвертон” ўз ўйин услубини ўзгартирди ва 30 ўйиндан кейин 57 очко тўплаб, турнир жадвалида “Манчестер Юнайтед”дан юқорироқда бормоқда. Ўтган мавсумларнинг шу палласида Мойес бошчилигидаги клуб ҳозиргидан ўртача 12 очко камроқ тўпларди (51, 40, 40, 45, 48).

Бу икки мураббийни таққослар экан, жамоа ярим ҳимоячиси Росс Баркли ҳам тактика масаласига эътибор қаратди. “Мартинес ҳам Дэвид Мойесга ўхшашроқ тарзда иш олиб боради. Уларнинг ҳар иккиси ҳам машғулотларни ўз назоратлари остида бўлишини яхши кўришади. Лекин Мартинес Мойесдан кўра кучлироқ тактик. У келгач, биз тактика борасида жуда кўп иш олиб бора бошладик. Бу мен учун жуда фойдали, ахир мен ҳали ёш футболчиман”, деган эди Баркли.

8. Мойес бошчилигидаги МЮнинг ўйин услубидаги камчиликларни қуйидаги кадрлар яққол очиб беради. Умуман олганда, ҳар турли кадрлар орқали Мойеснинг ҳимояси қандай эканини тушунтириб бериш мумкин.

Қуйидаги суратлар Пеп Гвардиоланинг “Баварияси ва Мойеснинг МЮси орасидаги фарқни кўрсатиб туради.
 


“Манчестер Сити”га қарши ўйинда футболчилар пас ўйнаш учун бир-бирига максимал қулай масофада жойлашган ҳолда “Бавария” ўз ҳужумини бошламоқда.


 
“Фулхэм”га қарши ўйинда Рафаэль ўзига энг яқин футболчи 15 метр узоқликда жойлашган  вазиятда жамоа ҳужумини бошлаяпти.

9. “Фулхэм”га қарши ўйинда (2:2) “Манчестер Юнайтед” 81 маротаба қанотдан ҳаволатиб жарима майдонига тўп узатди ва ундан 18тасигина “қизиллар”га бориб тушди. Бу эса бутун футбол жамоатчилиги учун кулгу мавзусига айланди.

Мавсум давомида ҳужумда вариантлилик ва кескинлик етишмаяпти. Кўпчилик буни Ферюсондан мерос бўлиб қолган таркибнинг у қадар маҳоратли эмаслиги ва ёши ўтиб қолгани билан боғлаяпти. Бироқ “Ливерпуль” ва “Манчестер Сити”га қарши айнан тактик жиҳатдан расво ўтказилган ўйинлар бу фикрни инкор қилиб турибди.

Ўтган йилнинг январь ойида “Манчестер Юнайтед” ўз майдонида “Ливерпуль”ни 2:1 ҳисобида мағлуб қилганди. Ўйиннинг катта қисмида устунлик айнан “Юнайтед” томонида бўлган, тўпга эгалик бўйича ҳам кўрсаткич Ферги шогирдларида анча яхшироқ эди. Рақиб дарвозасига 15та аниқ зарба йўллаган. 12 кун аввал ливерпулликларга қарши майдонга тушган 14 футболчининг 10таси ўша ўйинда ҳам ўйнаганди. Бу сафар “иблислар” бутун ўйин давомида дарвоза томон бир дона анқи зарба йўллаган. Бу сўнгги 5 йилликнинг энг ёмон кўрсаткичидир.

Мойес 18 ойдан бери “Ливерпуль”да иш олиб бориб, “қизиллар”ни кучли, барқарор, ҳужумкор, олдинги чизиқда кўп вариантли жамоага айлантира олган Бренден Рожерсга барча жабҳаларда бўйича мағлуб бўлди. Рожерс ўз жамоасида қилган ишларнинг ҳеч бирини Мойес амалга оширишни бошлагани ҳам йўқ.

Гари Нейвилл “Сити”га қарши ўйиндан сўнг шундай деганди: “МЮ” қай тарафга қараб ҳаракатланаётгани ҳақида ўйлаб кўрса ёмон бўлмасди. Жамоа ҳужумида на тезлик ва на аниқлик бор. Айни вақтда улар ростакамига инқироз кўчасидадир”.

10. Кўпчилик Мойеснинг жамоадаги энг креатив футболчиларидан бири – Шинжи Кагавани таркибга жуда кам киритаётганидан норози. Кагаванинг собиқ клуби “Боруссия” бош мураббийи Юрген Клопп бу ҳақида тўхталиб ўтганди.   

         Трансфер бозори

11. “Манчестер Юнайтед” ва Мойес футбол жамоатчилиги фикрига кўра ёзги трансфер мавсумини бекорга ва бефойда ўтказиб юборишди. Мойес Сеск Фабрегас, Криштиану Роналду, Лейтон Бэйнс, Фабиу Коэнтрау ва Андер Эррераларни ортидан қувиб, ҳеч бирини қўлга кирита олмади ва оҳир оқибат Мойеснинг “Эвертон”даги шогирди Маруан Феллаинини 27,5 миллион фунт эвазига сотиб олди. Мавсум ўртасида Хуан Мата сотиб олинди ва шу икки футболчи учун 70 миллион сарфланди. Ҳозир эса Мойес нима учун бу икки футболчига шунча ҳаражат қилингани ҳақидаги саволларга жавоб ҳам бера олмаяпти.   

12. Феллаинининг нархи, албатта, унга тўланганича эмас. У мавсум аввалидан бери 17та ўйиндагина майдонга тушди. Бирорта ҳам гол урмади. Бирорта ҳам голли пас бермади.


 
13. Мата ҳақида хулоса чиқаришга ҳали эрта. Бироқ унинг жамоага таъсири ҳозирча минималь даражада. Унинг жамоага қўшилишини ажойиб қарор деб ҳисоблаган экспертлар ўйланиб қолишди: Балки Жозе Моуриньо Хуанни мана шундай катта пулга сотиб, лотореядан катта ютуқ ютиб олгандек бўлгандир. “Юнайтед” таркибида 9та ўйинда майдонга тушган Мата бирорта ҳам гол урмади ва дарвоза томон биттагина аниқ зарба йўллади. Мойес унинг учун 42,5 миллион фунт тўлади ва бу футболчидан қандай қилиб максимал фойда чиқаришни билмаяпти. Кўпинча у ўзи севган ҳужумчи ортидаги жойига қўйилмаяпти ва у голли вазиятлар яратиш билан шуғулланиш ўрнига тўпни у ёқдан бу ёққа узатиш билан машғул бўлишига тўғри  келяпти.


 
14. Жамоа раҳбарлари ёзги трансфер мавсумида трансферлар учун 100 миллион фунт ажратишга тайёр. Жамоани қайта қуришга бўлган эҳтиёж яққол сезилиб турибди. Бироқ бу пулларни сарфлашни Мойес тўғри амалга ошира олармикан?

Келинг, майли,Феллаини ва Матанинг ўйинлардаги иштирокини четга суриб турамиз. Тони Кроосдек футболчилар ҳам Мойес бтилан ишлашни хоҳлашига ишониш қийин экани-ю, 51 ёшли мутахассиснинг бундай катта бюджет билан ишлаш тажрибаси йўқ эканини ҳам эътиборга олмай турамиз. Ҳатто “Эвертон”даги ҳаридлари ҳам унинг трансфер бозорида яхши ишлай олмаслиги ҳақида гувоҳлик бериб турибди. У кучли футболчиларни сотиб олганида, улар аввалги клубларидагидек яхши ўйнаб кета олишмаган. У сотиб олган энг қимматбаҳо футболчилар – Якубу, Жонсон, Битти жуда кам гол киритган.

Таҳқирланиш

 “Юнайтед” ушбу мавсумда, умуман олганда ютиши керак бўлган, жуда бўлмаганда мағлуб бўлиши керак бўлмаган, узоқ вақтлардан буён ютқазмаган жамоаларига ўйинни бой бериш, мағлубиятсиз серияларни якунлаш билан банд.

15. “Вест Бромвич” “Олд Траффорд”да 1987 йилдан буён мағлуб бўлмаганди ва бу анъанага Мойеснинг МЮси чек қўйди. “Вест Бром”нинг ҳеч бир футболчиси уларнинг жамоаси сўнгги марта “Юнайтед”ни ютганида туғилмаган ҳам эди.

16. 1992 йилдан бери МЮ майдонида ғалаба қозонмаган “Эвертон” 2013 йил декабрида 1:0 ҳисобида ғалаба қозониб, ўзининг собиқ бош мураббийини уятга қўйди.

17. Йоан Кабайнинг “Олд Траффорд”даги декабрь ойида урган голи 41 йилдан бери “Ньюкасл”га насиб этмай келган ғалабани тортиқ этди.
 
18. “Тоттенхэм”га ўз майдонида мағлуб бўлган “Юнайтед” 20 йиллик мағлубиятсиз  анъанага чек қўйди.

19.  “Суонси” январда Англия Кубоги доирасида ўз тарихида биринчи мартда МЮни мағлуб этди. Фергюсон ўзининг 27 йиллик фаолияти давомида Кубокнинг учинчи босқичида фақат бир мартагина чиқиб кетган. Бу ишни Мойес ўзининг илк мавсумидаёқ амалга ошира олди.

20. “Стоук” февралда 1984 йилдан бери биринчи марта “Манчестер Юнайтед”ни мағлуб этди.

21. “Олимпиакос”га Чемпионлар Лигаси 1/8 финали босқичининг биринчи ўйинида мағлуб бўлиб, “Юнайтед” ўз тарихида биринчи марта грек клубига ютқазди.

22. “Манчестер Сити”га қарши ўз майдонида 0:3 ҳисобида мағлуб бўлган МЮ премьер-лига тарихида биринчи марта ўйиннинг илк дақиқасидаёқ гол ўтказиб юборди.


давоми бор...

Аброр Қодиров тайёрлади.