Расман: Предраг Роган - «Динамо» бош мураббийи

Самарқанд вилояти ҳокими, вилоят футбол ассоциацияси президенти Эркинжон Турдимов ҳамда клуб бош ҳомийси «Agromir Buildings» таклифига кўра, «Динамо» ПФК жамоаси бош мураббийлигига хорижлик мутахассис таклиф этилди. Сербиялик Предраг Роган «Динамо» клуби бош мураббийи этиб тайинланди. 47 ёшли мутахассис билан бир йиллик шартнома имзоланди. Сербиялик мураббий тез орада клуб машғулотларига келиб қўшилади.

Шунингдек, югославиялик собиқ футболчи, сўнгги йилларда Сербия ёшлар жамоасида (U-19) мураббий сифатида фаолият юритган Иван Йевич «Динамо» клубида Предраг Роганга ёрдамчи мураббий сифатида иш бошлади. 46 ёшли мутахассис жамоа машғулотларида қатнашмоқда.

Маълумот учун, Предраг Роган 1974 йилнинг 2 август куни Сербияда туғилган. УЕФАнинг «Про» лицензиясига эга мутахассис 2011 йилдан буён мураббийлик фаолиятини юритиб келмоқда. Хусусан, у Сербиянинг «Рад» (2011 йил), «ФК Палич» (2013), «Земун» (2014), «Мачва» (2015), «Бачка Топола» (2018), «Спартак Суботница» (2018), «Напредак» (2019), «Уйпешт» (Венгрия, 2020) жамоаларини бошқарган. Сўнгги 2021 йилда эса Сербия Суперлигаси вакили «Вожводац» клубини бошқарган.

«Динамо» клуби 5 январдан буён Самарқандда янги мавсумга тайёргарликни олиб бормоқда. Жамоа бир қатор футболчилар билан музокара ўтказмоқда.

Эслатиб ўтамиз, 28 декабрда сайтимизда "Эшитдик-да!" рукни орқали Предраг Роганнинг самарқандликлар бош мураббийига айланганини маълум қилгандик.