30+.Баҳоси қиммат қариялар

Матьенинг “Валенсия”дан “Барселона”га трансфери ҳақида жуда кўплаб гаплар айтилди. Кўпчилик Матье бу пулларга арзимаслигини ва буқарор нотўғрилигини таькидлашди. Агар тарихга назар ташлайдиган бўлсак, Матье бундай гап сўзларга қолган биринчи футболчи эмас.

Габриэл  Батистута (31 ёш)

2000 йилда “Фиорентина”дан “Рома”га 32 миллион эвазига кўчиб ўтган.

“Фиорентина” аргентиналик футболчи учун 9 йил уй вазифасини бажарди. Айнан шу ерда у машҳурликка эришди. Футболчи Италия клуби сафида 332 ўйинда майдонга тушиб 207та гол уришга муваффақ бўлган, аммо жиддий совринларни юта олмаган. Ҳа, у Италия Кубоги ва Италия Суперкубоклари соҳиби бўлган, аммо Скудетто ёки еврокубокларни бирор марта боши узра кўтармаган.



Шу сабабли Габриэл 2000 йилда “Рома”га кўчиб ўтади, бу трансфер римликлар учун 30 миллионга тушди. У янги клубдаги илк мавсумидаёқ 25 гол уради ва узоқ кутган Скудеттони қўлга киритади. 30 миллион евро ўзини тўла оқлади. Аммо футболчининг фаоллиги бор йўғи 1 мавсумга етди. Кейинги йиллар давомида у ўзининг соясга айланди ва 4 йилдан сўнг фаолиятини Қатарда якунлади.

Самуэль Это’О (30 ёш)

2011 йил, “Интер”дан “Анжи”га 30 миллион эвазига

Камерунлик ҳужумчи “Интер” сафида бор йўғи икки мавсум ўйнайди, аммо клубга жуда катта фойда олиб келди.Биринчидан, Это’О “Интер”да 2010 йил 5та совринга эга чиқади. Иккинчидан, клуб ундан катта маблағ ишлаб олди: аввалига Ибрагимовични “Барселона”га 46 миллион ва Это’О эвазига сотган “Интер”, икки йилдан сўнг “Анжи”дан  яна 30 миллион ишлаб олади.



Это’О Доғистон клубида икки ўртача мавсум ўйин ўтказди, аммо унинг исми ўз ишини қиларди: “Анжи”ни ҳамма таний бошлади. Агар Роберто Карлоснинг сўзларига ишонсак, жамоанинг юлдузли асосини Самуэл ташкил қиларди.

Диего Милито (30 ёш)

2009 йил, “Женоа”дан “Интер”га 25 миллион евро
 
Диего Милито “Женоа”да 2008/09 йилги мавсумда 34 учрашувда 26та гол уради ва Жозе Моуриньо қизиқишлари доирасига тушиб қолади. Бу аргентиналик футболчи учун “Интер” клуби 25 миллион евродан кечади. У биринчи мавсумидаёқ барчанинг оғзини ёпиб қўйди. Унинг Чемпионлар Лигаси финалидаги икки голи, Италия Кубогидаги ғалаба голи ва “Интер”га миллий чемпионатнинг сўнгги турида чемпионликни совға қилган гол 25 миллионни ювиб кетди.



Кейинги мавсумларда Диегонинг ёши ўз сўзини айта бошлади, кетма-кет жароҳатлар, аммо булар ҳам Милито “Интер” учун 145 учрашув ўтказиб, 71та гол уришга ҳалал бермади. Шу йилнинг июн ойида 35 ёшли “амаки” ўз ватанида тўп сургани учиб кетди.

Златан Ибрагимович (30 ёш)

2012 йил, “Милан”дан “Пари Сен-Жермен”га, 21 миллион евро

2010 йил, августнинг сўнгги кунлари. Златан Ибрагимович “Барселона”дан “Милан”га кўчиб ўтади. Швед А серия чемпионлигини қўлга киритади ва Италиянинг энг яхши футболчиси дея тан олинади ва ўзининг 30 ёшида “Пари Сен-Жермен”дан яхшигина таклиф олади.



Ибра кузда 33 ёшга тўлади, амму у ҳозир ҳам француз клубининг асосий футболчиларидан бири ҳисобланади. У Париж клубида француз лигаси Кубогини, Франция Суперкубогини ва икки бор миллий чемпионатни ютади. Шу вақт ичида у энг яхши тўпурар номига ҳам эга чиқади. Ибрагимович бу ютуқлари билан тўхтаб қолмоқчи эмас ва Чемпионлар Лигаси ғолиблигига интилмоқда.

Клод Макелеле (30 ёш)

2003 йил, “Реал”дан “Челси”га, 20 миллион евро

Франциялик ярим ҳимоячи “Реал”да Зидан, Фигу, Раул ва бошқалар билан елкама-елка учта ажойиб мавсум ўтказади, аммо унинг қадрига фақат кеч етишди. Макелеле кўпинча қора ишлар билан банд бўлгани сабабли, майдонда унча кўринмасди.Айнан у рақибларни қарши ҳужумга қочиб кетмасликларини таъминлар эди.



“Реал” раҳбарияти унга тўғри баҳо бера олмади ва шартномани узайтирмади. Ўша пайтда бу ишга Роман Абрамович аралашади ва 30 ёшли футболчини 20 миллион евро эвазига сотиб олади. Бунинг натижасида Макелеле Жозе Моуриньонинг етакчи футболчиларидан бирига айланади. Клод лондонликлар сафида 5 йил тўп тепади ва “Челси” уни қийнамасдан, эркин агент сифатида қўйиб юборади.


Жасур Асланов таржимаси.