Март ойида "Динамо" мураббийлар штаби тенгсиз

Ўтган ойда Самарқанднинг "Динамо" клубига Ўзбекистоннинг "Лестери" деган лақаб қўйилди. Бунга етарли сабаблар бор албатта. Ўтган мавсумда биринчи лигада иштирок этиб қайтган "Динамо" элитага қайтишини Бекободдаги ажойиб ғалаба билан бошлади - 2:0. Сўнгра "Шўртан" 3:0 ҳисобида тор-мор этилди. Тошкентда "Пахтакор" меҳмони бўлган "арслонлар" 1:0 ҳисобида ғалаба қозониб чемпионатни кетма-кет 3та ғалаба билан бошлади! Бундан ташқари жамоа мана шу ўйинларда умуман гол ўтказгани йўқ. Ойнинг сўнгги кунида "Динамо" "Навбаҳор"га ютқазиб қўйганини ҳам қўшимча қилиб қўйиш керак. Лекин дунёда мағлуб бўлмайдиган жамоа умуман йўқ.

Шу сабабли кўпчилик "Динамо"нинг сенсацион "юришини" ўтган мавсум Клаудио Раньери бошчилигида Англия премьер-лигасида ғолиб бўлган "Лестер"га ҳам қиёслашди. Жамоа сафида деярли юлдуз футболчилар йўқлиги, ёш ва ғайратли ўйинчиларнинг майдонда борларини бериб ўйнашлари туфайли мазкур натижалар қайд этилди.

Championat.asia сайти талқинига кўра март ойининг энг яхши мураббийи деб "Динамо" клуби мураббийлар штаби тан олинди. Жамоа бош мураббийи Олег Тюлькин чемпионат бошланишига оз фурсат қолганида жамоани қабул қилиб олди ва шогирдларини ғалабалар сари бошлай олди. Жамоанинг ғалабаларида Илҳом Шариповнинг ҳам каттагина хиссаси борлиги барчага ойдек равшан. Бундан ташқари мураббий Учқун Қобилов ҳам бу штабда анчайин самарали меҳнат қилмоқда.  

Мавсумни яхши бошлаган "Динамо" кейинги ойларда ҳам бу ғалабали юришини давом эттира олармикин. Биргаликда кузатишда давом этамиз.

Март ойида шунингдек "Локомотив" мураббийлар штаби, "Насаф" устози Рўзиқул Бердиев ҳамда "Машъал" бош мураббийи Александр Хомяков ҳам ўз жамоалари билан ижобий натижалар қайд эта олишганини қайд этиш лозим.