Зинченко жамоасининг МЮга учраган мағлубиятини изоҳлади

Эслатиб ўтамиз, АПЛ 29-туридан ўрин олган марказий учрашувда “Манчестер Юнайтед” ҳамшаҳарлари ”Манчестер Сити”ни 2:0 ҳисобида мағлуб этганди.

“Қийин учрашув бўлди. Юнайтедга қарши ўйнаш доим оғир бўлган, чунки улар яхши ўйин намойиш этишади. МЮ аъло даражада ҳимояланди ва прессинг уюштирди. Биз эса олдинги чизиқда янада агрессивроқ ҳаракат қилиб, яратилган вазиятлардан унумли фойдаланишимиз керак бўлади.

Биз ўзимиз янада кучлироқ ўйнашимиз керак. Футбол фақат ташаббусни ўз кўлингда сақлаб туриш эмас, балки гол уриш ҳам демакдир. Ғалаба қозонмоқчи бўлсанг, албатта гол уришинг, хавфли вазиятларни яратишинг ва олдинги чизиқда босимни оширишинг керак. Биз рақиб бешта ҳимоячи билан тўп тепишини билардик ва бунга тайёр эдик. “Манчестер Юнайтед”ни табриклайман, бу бизнинг ёмон ўйинларимиздан бири эди.

Ўйинни мураббийимиз Гвардиола билан таҳлил қиламиз, у ўйин ҳақида ўз фикрларини айтади. Биз эса фақат олдинга қараб, олға юришимиз керак. Олдинда ҳали кўплаб учрашувлар бор ва биз таслим бўлишни истамаймиз”, дея футболчининг сўзларидан иқтибос келтирмоқда Manchester Evening News.