Жўра Хонназаров халқаро турнири. “Бунёдкор-2001” ярим финалда

Бугун ушбу мусобақанинг гуруҳ босқичи доирасидаги сўнгги учрашувлар бўлиб ўтди. “Бунёдкор-2001” мазкур турда Жиззах шаҳри жамоаси билан гуруҳ ғолиблиги учун кураш олиб борди. Ушбу ўйингача ҳар иккала жамоада биттадан ғалаба борлиги ва гуруҳдан фақат биринчи ўринни эгаллаган жамоагина кейинги босқичга чиқиши боис учрашув аҳамияти катта бўлди.

Учрашувда биринчи бўлиб жиззахликлар ҳисобни очишди. Вазиятни ўнглаш учун тошкентликлар катта куч билан олдинга ўтишди. Бу ҳаракатлар кўп ўтмай самарасини берди. Бурчакдан ошириб берилган тўпни Жасур Ҳолдоров чиройли тарзда дарвозага жойлаб қўйди – 1:1. Кейинги дақиқаларда ўйин темпи бироз тушди. Лекин биринчи тайм якунланишига бир неча дақиқалар қолганида жиззахликлар яна ҳисобда олдинга ўтиб олишди – 1:2.

Иккинчи бўлимда “қалдирғочлар” мувозанатни тиклашга урунишди ва ўз ниятларига эришишди. Бурчакдан ошириб берилган тўпни Зокир Ҳасанов дарвозага аниқ йўллаб, ҳисобни тенглаштирди – 2:2.

Ҳар иккала жамоа учун қийин кечган баҳс жангавор дуранг билан якун топди.

“Б” гуруҳи. Якуний жадвал

№	Жамоа	Ў	Ю	Д	М	Т-Ф	О
1	“Бунёдкор”	2	1	1	0	11-2	4
2	“Жиззах”	2	1	1	0	6-3	4
3	“Чирчиқ”	2	0	0	2	1-13	0

“Қалдирғочлар” тўплар фарқига кўра гуруҳда биринчи ўринни эгаллашди. “Бунёдкор-2001” ярим финалда “Локомотив” билан беллашади. Ўйин “Чилонзор” стадионида соат 10:00да бошланади.