Жамшид Искандеров: "Чемпионлар лигасида яхши натижа кўрсатишга интиламиз"

Айни пайтда терма жамоа йиғинида бўлган Жамшид саволларимизга жавоб қайтарди.

- Мавсум жамоа учун қандай ўтди?
- Чемпионат жуда қийин кечди. Ҳар бир жамоанинг қаршилигига дуч келдик. Ўз навбатида ўйинларга жиддий тайёргарлик кўрдик. Мураббийлар билан машғулотларда қилган меҳнатимиз натижасида чемпионликни қўлга киритдик. Аввалги йилдан кейин зафар қучишимиз жуда муҳим эди. Олдимизга қўйилган вазифани уддалай олдик.

- Мавсумни мағлубиятсиз тугатиш мумкинлиги ҳақида ўйлаганмидингиз?
- Асосий мақсад ҳар бир учрашувда чиройли футбол кўрсатиб, ғалаба учун ҳаракат қилиш эди. Лекин мавсумни мағлубиятсиз тугатамиз деб ўйламагандим. Футболчилар мураббийлар томонидан берилган кўрсатмаларни бажаришга интилди ва чемпионатни ажойиб тарзда якунладик. Бунда менежеримиз бошчилигидаги мураббийлар штаби ҳамда жамоадошларимнинг ҳиссаси катта бўлди.

- Қайси ўйинлар энг оғир кечди?
- Мен учун осон учрашувнинг ўзи бўлмади. Биринчидан, ҳар бир рақибни жиддий қабул қилиш керак ва ўйинга шунга яраша тайёргарлик кўриш керак бўлади. Иккинчидан, "Пахтакор"га қарши баҳсларда ҳамма ўзининг яхши тарафларини кўрсатишни хоҳлайди. Шу сабабли осонлик билан ютган бирорта ўйинимиз бўлмади.

- 2 йил аввал Чемпионлар лигасида жамоадаги ёш футболчилар тажрибага эга бўлишди. Жамоа ҳозир бу турнирда ижобий натижа қайд этишга қодирми?
- Ҳа, 2 йил олдин биз муҳим тажрибага эга бўлдик. Энди эса барчамизнинг ниятимиз Чемпионлар лигасида яхши ўйин ва натижа кўрсатишдир. Биз майдонда қўлимиздан келганча ҳаракат қиламиз. Худо хоҳласа, ушбу мусобақада ҳам мухлисларни хурсанд этамиз.