Зафар Полвонов “жўжаларни кузда санайдиган” ҳужумчи

Футболчини олмалиқликлар бош мураббийи Игорь Шквирин ҳам танқид қиляпти. Лекин, Зафарнинг фаолиятидаги голларга оид кўрсаткичларни яхшилаб ўрганиб чиқадиган бўлсак, ҳозирги вазиятни нормал ҳолат сифатида қабул қилиш лозим.

Полвонов ўзининг аксарият голларини доимо чемпионатнинг иккинчи ярмида киритиб келган. Буни аниқ рақамларда кўриб чиқамиз.

Полвонов 2014 йилги олий лигада жамоасининг барча ўйинларида иштирок этди. Яъни 5 учрашувда. Шуларни қўшиб ҳисоблаганда, Зафар 2005 йилдан буён айни кунгача олий лигамизда жами 151та ўйин ўтказиб, уларда 41та гол урган. Ҳужумчи учун олий лигада бу йил ўнинчи мавсум кетяпти. Полвонов шу давр мобайнида, алоҳида чемпионатлар бўйича олиб қарайдиган бўлсак, йил давомида уч маротаба 5 ва ундан кўп гол ура олган. Фақат миллий чемпионат беллашувлари назарда тутиляпти.

2010 – 9та (“Хоразм” сафида)
2012 – 7та (“Динамо”/“Олмалиқ”, 1+6)
2013 – 14та (“Олмалиқ”)
Футболчи сермаҳсуллик қилган ушбу мавсумларда у киритган голлар 1- ва 2-давралар бўйича қуйидагича тақсимланган:
2010 – 2/7; шу жумладан – барча 9 голни 23 майдан кейинги турларда киритган.
2012 – 1/6; шу жумладан – барча 7 голни 14 июндан кейинги турларда киритган.
2013 – 5/9; шу жумладан – бу голлардан 12тасини 30 майдан кейинги турларда киритган.

Юқоридагилардан яққол кўриниб турибдики, Зафар Полвоновдан кетма-кет голлар доимо баҳорнинг охири ёки ёзда ва айниқса – кузда кузатилмоқда. Шунинг учун, уни ҳозирча танқид қилмаслик маъқул. Чунки у “жўжани чиндам ҳам кузда санайдиганлар” тоифасидан. Бироқ ҳужумчи, гап бораётган у учун ёмон анъанага зид тарзда, тўп киритишни 6-турда “Қизилқум” билан Олмалиқдаги ўйинда амалга оширса, бундан, табиийки, Шквирин ҳам, унинг жамоаси ишқибозлари ҳам хурсанд бўлишади. Албатта Зафарнинг ўзи ҳам. Агар ҳақиқатдан ҳам шундай бўлса, Полвонов бу йилги илк голини мазкур мақолага бағишлаб юборадими ҳали...

Зафар, ҳали ҳаммаси олдинда!

Улуғбек Мирзаев