Юсуф Адам: “Ўзбекистон клублари Осиёда ўз нуфузига эга”

-Ғалаба ҳар иккала жамоа учун аҳамиятли. Албатта бунда биз ғолиб чиқиш учун бор кучимиз билан ҳаракат қиламиз. “Насаф” ҳақида етарлича маълумотларга эгамиз. Жамоа иштирокидаги 2-3 та ўйинни кўриб чиқдик. Рақибимиз таркибида яхши футболчилар жамланишган. Умуман олганда Ўзбекистон клублари ва терма жамоаси қитъа миқёсида ўзига хос нуфузга эга. Уларга қарши ўйин қийин бўлиши аниқ. Жамоамиз таркибида йўқотишлар йўқ. Барча футболчилар машғулотларда иштирок этишмоқда, -дейди Юсуф Адам.

Мурод Нажи: - Бисмиллоҳир раҳмонир раҳийим. Плей оф бир ўйиндан иборат. Аммо биз ўйинни ўз майдонимизда ўтказамиз. Бу бизга устунлик беради ва биз бундан унумли фойдаланишга ҳаракат қиламиз. Қолаверса, бизда ҳозир чемпионат баҳслари давом этмоқда. Жамоамиз охирги ўйинларда ғалабага эришиб, турнир жадвалида юқори поғонада бормоқда. Бу бизга руҳий устунлик бағишлайди. “Насаф”га қарши 2012 йили ОЧЛ баҳсларида “Ар Райан” таркибида майдонга тушганман. Ўшанда иккита ўйинда ҳам ғалабага эришган бўлсакда, бунга осонликча эришмаганмиз. Лекин ҳозирги “Насаф” олдингига қараганда ҳар томонлама кучайган.