Юрий Саркисян “Бунёдкор”да иш бошлади

Юрий Вазгенович Саркисянга алоҳида таъриф бериб ўтишнинг ҳожати йўқ. Унинг бошчилигида Фарғонанинг “Нефтчи” клуби беш карра мамлакат чемпиони, бир неча бош совриндори, шунингдек Ўзбекистон кубоги баҳсларида муваффақият қозонган.

Ўзи учун қадрдон бўлган “Нефтчи” клуби билан хайрлашган Юрий Вазгенович маълум вақт хордиқ чиқариб олди. 2014 йилги мавсум арафасида унга бир қатор чорловлар бўлди. Таклифлар орасида ўзи учун ҳар томонлама қулайини танлаган Саркисян “Бунёдкор”да иш бошлади. Энди Юрий Вазгенович мамлакатимизнинг амалдаги чемпиони ва кубоги соҳиблари бош мураббийи Миржалол Қосимовга маслаҳатчи сифатида иш юритади.

Унинг чорак асрдан зиёдроқ вақт мобайнида мураббийликда тўплаган бой тажрибаси “Бунёдкор”нинг муваффақиятларга етаклашда асқотади.