Ёшлар терма жамоаси машғулоти ва ўйини

Футболчилар дастлаб ўйин олдидан енгил чигал ёзди машғулотини олиб боришди. Дарвозабонлар билан Марат Галимов шуғулланган бўлса, футболчиларни икки гуруҳга бўлган ҳолда Илҳом Мўминжонов шуғуллантирди. Равшан Ҳайдаров эса ўйинчиларнинг ҳаракатларини юқоридан туриб кузатди. У ҳар бир футболчи ҳақида тўлиқ таассуротга эга бўлиш учун машғулот ва ўзаро ўйинни диққат билан кузатиб борди.

Футболчилар янги мураббий қўл остида илк бор йиғинда иштирок этаётганлари боис ўзларини кўрсатишга уринишди. Иккига бўлинган ҳолда ўтказилган учрашувда бу ҳолат яққол кўзга ташланиб турди. Футболчилар жамоавий ўйиндан кўра ўз ҳаракатларига кўпроқ урғу беришди. Натижада баҳсда кескин тўқнашувлар кўп кузатилди, ёшлар бир-бирларини аямасдан кураш олиб боришди. Шу билан бирга беллашувда ақлли ҳаракатлар кўп бўлди дейиш қийин. Бир ҳимоячи билан уч нафар ҳужумда иштирок этаётган футболчи қолган вазиятларда ҳамт тўпни шеригига етказиб бермай, дарвоза томон ўзи зарба йўллаш каби ҳолатлар кўп учради. Албатта, ҳар бир футболчи янги мураббийга нималарга қодир эканлигини исботлашни истайди. Ҳайдаров тажрибали мутахассис ва у вазиятни тез орада ўнглашига умид қиламиз.

"Қизиллар" ва "кўклар" учрашувида дастлаб қизил рангли жилеткаларда ўйнаган жамоа вакиллари икки тўп киритишди. Дастлаб биринчи бўлим охирида Иброҳим Абдуллаев пенальтидан унумли фойдаланди. Иккинчи бўлимда Равшан Хурсанов қизил либослиларнинг иккинчи тўпига муаллифлик қилди. Ўйин охирларида "кўклар" 2 дақиқада 2 гол уришди. Жавоҳир Сидиқов ҳисобни қисқартирган бўлса, Элдор Шомуродов мувозанатни тиклади. Шундай қилиб, ёшлар термасининг 2 таркибга бўлинган ҳолда ўтказган баҳси 2:2 ҳисобида якунланди. Шанба куни кечқурун эса жамоа Туркия орқали Венгрия пойтахтига жўнаб кетди.


Беҳзод Назаров.