Ёрқин Назаров: "Тўғри йўлдан кетяпмиз"

"Сўғдиёна" бош мураббийи Ёрқин Назаров жамоанинг "Андижон"га қарши ўртоқлик ўйинидан кейин фикрларини билдирди.

- Жамоа ўйинидан қанчалик кўнглингиз тўлди?

- Аввало, бу ўртоқлик ўйини эканлигини инобатга олиш лозим. Кеча икки маҳал шуғуллангандик. Бу ўйинда жароҳат бўлмаслиги керак эди. Шунчаки чизиқларни бир-бирига боғлаб олдик, тўғри йўлдан кетяпмиз. 

Ўйиндан қониқдим. Натижага қараш йўқ. Ҳозир ким қаерда ўйнашини ҳал қилиб оляпмиз. Биринчи баҳс учун анча яхши кўриндик.  

- Янги келган футболчиларнинг ўйини борасида қандай фикрдасиз?

- Бир ҳимоячимизда ўйин амалиёти бўлмагани боис уни икки тайм ўйнатдик. У яхши даражадаги футболчи, спорт формаси тикланишини таъминлашимиз керак. Ҳужумчимиз ҳам яхши савиядаги ўйинчи эканлиги кўриниб турибди. Янги келган легионерлар ҳаракатларидан қониқяпман.

- Олдиндаги режалар қанақа?

- Олдингидек, яхши ўйин кўрсатиб, мухлисларни хурсанд қилиш. 

- Яна назорат ўйинлари ва хориж йиғини борми?

- Яна назорат учрашувлари бор. Тошкентдаги Суперлига жамоаларига қарши баҳсларимиз бор. Кейин 27 январда Туркияга учиб кетамиз ва ўша ерда халқаро ўртоқлик ўйинларида майдонга тушамиз.