Япония - Иордания: Ўйин ва ўйин атрофидаги таассуротлар

Равшан Эрматов бошқарган учрашув шиддатини бир сўз билан айтиб бериш қийин. Бугунги кунда ТВ ривожланиб кетиши натижасида секин ўйинларни ҳам жуда тезкорлик билан кечаётгандек кўрамиз. Аммо Япониянинг ўйини ҳеч қандай ТВсиз ҳам жуда тезкор. Агар бу жамоа бирон бир сенсация билан кейинги босқичларда мағлубиятга учраб қолмаса, қийинчиликсиз финалга чиқади.



Келинг, бир бошидан бошласак. Ўйин маҳаллий вақт билан соат 20:00да бошланиши керак эди. Стадион ёнгинасидаги теннис кортида "Australian Open" мусобақаси бошланган. Мельбурн олимпия шаҳарчасида ким қаерга кетаётганини билмайсиз. Кимдир теннисга, яна кимдир футболга. Крикетга кетаётганларни ҳам учратасиз. Соат 18:00дан бошлаб мухлисларнинг стадионга кириши бошланди. Кўпчилик чипталарни интернетдан ҳарид қилиб олгани учун, кассага паспорт билан келса кифоя. Ёки нақдга олишингиз мумкин. Аммо паспортингиз бўлмаса чипта ололмайсиз. Бу муаммо эмас, қўлингизда "Менга чипта керак" деган ёзувли қоғоз ушлаб турсангиз, чиптафурушларнинг ўзи келади. Бор-йўғи, 5 Австралия доллари қимматига оласиз.



Стадион ичидаги шароит аъло даражада. Мусобақанинг тимсоли бўлган маскот стадионда гир айланиб юради. Мухлислар эса истаганча суратга тушишлари мумкин. Биздан фарқли равишда бу ерда секторларнинг пастки қатори қимматроқ саналади. Боиси қизиқарли тадбирлар айнан мана шу ерда бўлади. Ундан кейин дарвоза ортида ўтирадиган мухлислар учун алоҳида шоу-тадбирлар бор. Умуман олганда Австралияда деярли барча спорт ўйинлари мана шундай қизиқарли тарзда ўтади. Мамлакатда бир нечта спорт турлари оммавий бўлгани учун мухлисларни ўзига жалб этиш учун катта маркетинг рақобатига гувоҳи бўласиз. Биздан фарқли равишда хоҳласаям шу, хоҳламаса ҳам шу қабилида иш тутинг, икки кунда паттангизни қўлга тутқазишади.

Ўйин бошланиш арафасида, туннелдан биринчи бўлиб сариқ кийимдаги ҳамюртимизни кўрдик. Равшан Эрматов қанотдаги ёрдамчилари Баҳодир Қўчқоров ва Абдуҳамидулло Расулов билан жамоаларни майдонга бошлаб тушди.

Япония терма жамоаси таркибини ҳеч иккиланмасдан Осиёнинг Европадаги юлдузлари деб аташимиз мумкин. Дарвозабон Бельгияда фаолият олиб боради. Миланннинг иккита гранд клуби - "Интер" ва "Милан" сафида бир нафардан футболчи. Яна 6 нафар футболчи Германияда тўп тепяпти. Англияда сенсация қилишдан тўхтамаётган "Саутгемптон" вакили ҳам шу ерда.



Иорданияга қарши ўйинда майдонга тушган "европалик" японлар: Кавашима ("Стандарт"), Сакаи ("Штутгарт"), Хасебе ("Айнтрахт"), Хонда ("Милан"), Йошида ("Саутгемптон"), Инуи ("Айнтрахт"), Кагава ("Боруссия-Д"), Оказаки ("Майнц"), Нагатомо ("Интер"), Кийотаке ("Ганновер-96").

Барча Бенжаминни гапираётган бир пайтда ҳамюртинг учун хавотир олар экансан. Йўқ, ҳаммаси жойида бўлди. Аввалига Расулов ўйиндан ташқари ҳолатни жуда яхши аниқлай олди ва Япония терма жамоаси томонидан киритилган голни инобатга олмади. Эрматовнинг ундан кейинги ҳаракатларида ҳам хато кўрмадик. Баъзи вазиятларда японлар эътироз билан мурожаат қилдилар. Аммо, ҳакамимиз майдонда ким қарор чиқаришини яхши тушунтира олди ва Хонданинг жамоаси ўзини босиб олишга мажбур бўлди. Иккинчи бўлимда Қўчқоров урилган голни бекор қилди. Бу вазиятда ҳам ҳеч қандай эътирозга ўрин йўқ эди.



Биринчи бўлимда Япония Иорданияни ўз жарима майдончаси ичига қамади. Агар Амир Шафи бўлмаганида илк 45 дақиқанинг ўзидаёқ Иордания ўз дарвозасидан 3-4та тўп олиб чиққан бўларди. Бу терма жамоанинг аввалги ўйинлари ортда қолгандек гўё. Қарши ҳужумда ўйнади, аммо тўп тушганда қандай ҳаракат қилишни билмай қолдилар. Балки япон ҳимоячилари бунга қаршилик қилгандирлар. Иордания терма жамоасининг нақд 14 футболчиси 1990 ва ундан кейин туғилган футболчилардан иборат. Қариялар сони бор-йўғи тўрт нафар, улардан уч нафари дарвозабон. Бу терма жамоанинг келажаги бор.

Ўйин тугади, биринчи голдаги вазиятда ҳам Амир Шафи яхши ҳаракат қилганди, аммо у қайтарган тўп тўғри Хондага бориб тушди. Бундай паллада "Милан" ҳужумчиси нима қилишни жуда яхши билади. Иккинчи гол эса Кагава томонидан киритилди.



Ўйин ҳам тугади, Иордания ортга кетадиган бўлди. Аммо жамоа мухлисларига қойил қолмай иложингиз йўқ. Гарчанд терма жамоаси мағлубиятга учраган бўлса-да, автобус олдига чиқиб олган иорданияликлар қарсаклар билан футболчиларни руҳан қўллаб-қувватладилар. Японияда эса байрам эди, стадион атрофи япон мухлис ва мухлисалари билан тўлиб тошган. Бизда фақат эркак кишининг дўстлари билан стадионга келишини кўрасиз, бу ерда 5-6 нафар қизлар ҳам биргаликда ўйинларга келишади. Футбол улар учун байрам. Стадионга келаётган ҳар бир мухлис камида 50 доллар атрофидаги пулини у ерда қолдириб кетяпти. Кимдир еб ичса, яна кимдир атрибутикаларни харид қилади. Чипталар секторига қараб 5 доллардан 30 долларгача. Бу гуруҳ ўйинларига белгиланган нархлар.



Ўйин тугаганидан кейин микст-зонада кўз олдингизга келтира олмайсиз, қанчалик одам кўплигини. Афсуски, бу ҳудудда суратга олиш ман этилади, шунингдек, рухсатномангиз бўлмаса видео ҳам ололмайсиз. Матбуот анжуманларида видео чиқмаётганининг асосий сабаби ҳам шунда. Сиднейда бироз кўнгли бўш медиа-ходимлар ишлагани боис индашмаган экан, Брисбен ва Мельбурнда бу нарсаларга анча жиддий қарашяпти.

Ҳозирча шулар, эртага "Australian Open" ҳақида ҳикоя қиламан. Бу жуда қизиқ!

Нодирхўжа Юлдашев.