Янгиланаётган "Металлург" иккинчи лига клубини мағлуб этди

Металлургчилар пойтахтнинг “Оқтепа” жамоаси меҳмони бўлиб, 3:1 ҳисобида ғалаба қозонишди.

Жамоа мураббийлари мазкур назорат учрашувида ҳам асосан “Металлург” кўригида бўлиб турган янги ўйинчиларга кўпроқ эътибор қаратишди. Биринчи таймда бекободликларнинг амалда асосий таркиби бўлиши кутилаётган футболчилари тўлиқ устунликка эга бўлишди ва мезбонлар дарвозасини икки марта аниқ нишонга олишди. 

Аввалига Зафар Сафаев мезбонлар ҳужумини бартараф этиб, маъданчиларнинг тезкор қарши ҳужумини бошлаб берди. Дарвозабондан тўпни қабул қилиб олган Алишер Зиёвуддинов темпни сусайтирмасдан Зоҳид Абдуллаевни “Оқтепа” посбони билан рандевуга чиқарди. Бирга бир вазиятдан эса “Металлург” сардори унумли фойдаланиб, ҳисобни очди – 1:0.  

Биринчи тайм тугашига беш дақиқа вақт қолганда эса Ислом Исоқжонов қанотда рақиб ҳимоячиларини ортда қолдириб, тўпни жарима майдони марказига узатди. Алишер Зиёвуддинов Равшан Ягудин билан яккама якка ҳолатдан унумли фойдаланди. Дарвозабонни алдаб ўтиб, ўткир бурчак остида тўпни дарвозага йўллади – 2:0.

Бекободликлар биринчи бўлимни йирик ҳисобда ўз фойдаларига якунлашлари ҳам мумкин эди. Бироқ Равшан Ягудин икки марта пенальтини қайтаришга муваффақ бўлди ҳамда гарчи иккита тўп ўтказиб юборган бўлсада “тайм қаҳрамони”га айланди.

Иккинчи бўлимда “Металлург” мураббийлари асосан кўрикка келган янги ўйинчилар ҳамда ёшлар таркибидан қўшилган футболчиларга имконият беришди. Бу эса ўйиннинг тенглашишига олиб келди ва жамоалар бу таймда биттадан гол алмашишди. Ҳар иккала жамоа голларни 11 мертлик белгидан – жарима тўпидан киритди.

“Оқтепа” – “Металлург”  – 1:3 (0:2). Тошкент. 13 январь 2018 йил. Назорат учрашуви.
Ҳакамлар: Олим Толибжонов, Олим Абдувосилов, Дониёр Сайлолов.
Назоратчи: Марат Исмоилов.
Голлар: Зоҳид Абдуллаев (17), Алишер Зиёвуддинов (39), Тимур Ҳакимов (65-п), Тимур Толипов (78-п).
Амалга оширилмаган пенальтилар: Алишер Зиёвуддинов (12), Шаҳзод Шайманов (31).
“Металлург”: Зафар Сафаев, Шерзод Файзиев, Аброр Хусинов, Жасур Ҳасанов, Аброр Тошқўзиев, Жаҳонгир Абдумўминов, Азамат Розиқов, Шаҳзод Шайманов, Ислом Исоқжонов, Алишер Зиёвуддинов, Зоҳид Абдуллаев.
Захирадан майдонга тушганлар: Никита Рибкин, Муҳаммаджон Султонов, Муҳаммадодил Қаҳрамонов, Алишер Мирзаев, Худойшукур Сатторов, Дониёр Ҳошимов, Тимур Толипов, Миртўра Акбаров, Жавоҳир Мусажонов, Абдулла Исломов.