Яна бир бор L'italiano ва менга қўнғироқ қилган шоирга салом

Мақола шундай тугаган: “Хуллас, биз Италия эмасмиз, ўртоқлар. Ватанпарварлик ҳам, меҳмондўстликда ҳам, мурувват ва мардликда ҳам улардан анчагина орқадамиз. Шунинг учун ҳам Италия жаҳон чемпионлиги учун курашади, биз эса мундиалга бориш учун...”

Мақола чиққан кунидан бошлаб ўзини шоир деб таништирган бир инсон ҳар куни телефон қилганди. Мирзо Улуғбекларимиз, Амир Темурларимиз қаерга кетди, кимсан сен ўзи тирранча деган гапларни ҳар кун эшитишимга тўғри келди. Стоп! Мен футбол ҳақидаги газетада футболдаги ватанпарварлик ва мардлик ҳақида ёзаётган бўлсам, Амир Темурга бу ерда нима бор? Мақола бир-бирига ўхшаш икки жиҳатни солиштирган: А серия аъзоси “Парма”нинг йўқ бўлиб кетиши ҳамда Олий Лига вакили “Обод”нинг парчаланиши. Шунинг асносида Италия нима сабабдан биздан кучли эканига хулоса берилган.

Давиде Астори воқеасидан кейин ўша фикримга яна бир исбот топилгандек бўлди. А сериянинг чемпионлик учун курашмайдиган клуби етакчиси вафот этди ва бутун Италия футболи мотам эълон қилди. Асторининг сўнгги йўлга кузатилишидан тортиб, унга бўлган ҳурмат ва эътиборгача италияликларнинг ҳақиқий кучини кўрсатиб берди. Мен сизни яна бир марта ишонтириб айтаманки, бундай жипслилик олдида биз италияликлардан анчагина ортдамиз.

Алломалар, уламолар ўз йўлига. Бироқ футболдаги катта ғалабалар учун талаб қилинадиган бошқа жиҳатлар бор. Гап пул, шароит ёки мансаб ҳақида кетмаяпти. Миллионлар ўйинида шундай туйғулар ва ҳиссиётлар борки, уларнинг ҳеч бирини пулга сотиб ололмайсиз. Шунинг учун ҳам Бразилиянинг жин кўчаларидан чиққан болалар дунёни зир титратади, италияликлар доимо битта мақсад йўлида бирлашади, немис мухлисларни ҳамма бирдек ҳурмат қилади ва инглиз футболига бўлган ҳурмат доим трендда туради. Биз ҳозирча 30 январь кунги ўйиннинг 78-дақиқасида қарсак чалсакмикин деб ўйланиб ўтирибмиз. Италия эса “Фиорентина” футболчисини сўнгги йўлга шундай кузатяпти. Италиялик ҳар бир футболчи мана шундай иззат-икром учун ҳам жон бериб ўйнайди. Тотти футболдан кетаётганида орден ёки эгнига киядиган тўн учун эмас, унинг учун ёш тўкаётган мухлисларни кўриб тушунади футболда нима қилганини. Кейин эса Тоттига ҳавас билан бошқа Тоттилар етишиб чиқади.  

P.S. Биз ҳам шундай бўлишимиз керак демоқчи эмасман. Бизда Тотти кабилар йўқ, чунки уни тарбия қиладиган кучимиз ҳам йўқ. Шунчаки биздаги дунёқараш футболимизнинг қон-қонигача сингиб кетган. Футболни кўтариш учун аввал ўзимизни ва қарашларимизни ўнглаброқ олишимиз керак. Менга қўнғироқ қилган шоирдек акалар билан эса бунга бироз қийин эришамиз.