Хуршид Ғиёсов: "Жамоадаги ўзгаришлар бизга ижобий таъсир қилди"

Шиддатли кечган учрашувда томонлар муроса йўлини танлашди (1:1). Ушбу баҳсдан сўнг "Обод" жамоаси футболчиси Хуршид Ғиёсов ўйин ҳақида ўз фикрлари билан ўртоқлашди.

"Чемпионат сўнггида барча футболчиларда чарчоқ аломатлари бор эди. Барчаси биз ўйлаганимиздек рўй берди. "Пахтакор" клубини яхши биламиз, хато қилган жамоаларни кечириб ўтиришмайди. Бундай клуб билан дуранг ўйнаганимиздан хурсандмиз. Биз гол уруш учун бор кучимиз билан олдинга ўтгандик, аммо рақибларимиз дарвозасини бир маротаба ишғол қилдик, холос.

Жамоамиз бу йил илк бор олий лигада иштирок этгани боис чемпионат баҳсларига мослашиб олишимиз бироз қийин бўлди. Якунда ўзимиз учун керакли бўлган натижани қўлга киритдик. Жамоамизда бир қатор ўзгаришлар бўлди. Иккинчи даврада янги футболчилар сафимизга қўшилди. Бундай ўзгаришлар бизга ижобий таъсир қилди. Элитада қолганимиздан хурсандман", - дейди "Обод" жамоаси футболчиси Хуршид Ғиёсов.

Жаҳонгир Сотволдиев