Хотира. Ўн беш йил аввал Александр Иванков орамиздан кетганди

Ана шундай шукуҳли кунларда ўзбек футболининг таниқли вакилларидан бири, Ўзбекистон Республикасида хизмат кўрсатган мураббий, тажрибали мутахассис, собиқ СССР спорт устаси Александр Иванковни ёдга олишни ўзимизга жоиз деб билдик. 

Агар Александр Дмитриевич ҳаёт бўлганида бу йил 17 октябрь куни қутлуғ 70 ёшга тўлган бўларди. Кеча эса унинг бу ёруғ дунёни тарк этганига роппа-роса 15 йил тўлди. Иванковнинг футболчиликдаги ёрқин дамлари (1970-1977) “Пахтакор” клубида ўтди. Метин ҳимоячи Всеволод Бобров, Михаил Якушин, Гавриил Качалин, Вячеслав Соловьев, Вадим Терешенко каби машҳур мураббийлардан футбол сир-асрорларини ўрганган, уларнинг қўл остида ўйнаган. 

Иванков Геннадий Красницкий, Биродар Адбураимов, Баҳодир Ибрагимов, Тўлаган Исоқов, Владимир Фёдоров, Михаил Ан, Валерий Варюхин, Николай Куликов сингари футбол афсоналари билан елкама-елка майдонда жавлон урган. 

Футболчилик фаолиятини якунлагач ўзини мураббийликда синаб кўрган. 1986 йилда у Ўзбекистон ССР терма жамоасини бош мураббий сифатида СССР халқлари Спартакиадасига олиб борган. Ушбу мусобақада жамоамиз иккинчи ўринни эгаллаган эди. Айнан Спартакиададаги муваффақиятли иштирокдан сўнг унга хизмат кўрсатган мураббий унвони берилган. 1995 йилда Ўзбекистон миллий терма жамоаси, МҲСКда бош мураббий бўлиб ишлаган. Кейинчалик “Пахтакор” клубини ҳам бошқарган. 

Афсуски, бешавқат ўлим 2004 йилнинг 6 июнь куни Александр Иванковни орамиздан олиб кетди. Бугунги кунда унинг ўғли Денис Иванков ота изидан бориб, Ўзбекистон миллий терма жамоасида дарвозабонлар мураббийи бўлиб ишлаяпти.