Хосе Мария Мендез: "Бундай мухлисликни 20 йиллик фаолиятимда кўрмаганман"

“Эрон терма жамоасига қарши ўйнаш мумкинлигини кўрсатиб бера олдик. Балки биз бугун нималарга эришганимизни ва қайси босқичда ўйнаганимизни англаб ета олмаётгандирмиз. Кейинроқ буни тушуниб етармиз. Турнир давомида биз кучли рақиблар билан ўйнадик, Эрон эса ўзидан кучсиз бўлган рақибларни мағлуб этди. Бугун тезкор ўйин намойиш эта олмагандирмиз. Бугун мухлисларни алоҳида таъкидлаб ўтган бўлардим. Қайтараман, 20 йиллик мураббийлик фаолиятимда бундай мухлисликни кўрмаганман. Уларга катта раҳмат айтаман”, - дейди Хосе Мария Мендез.

- Учрашув тугагач Жаҳонгир Усмонов билан узоқ суҳбатлашиб турдингиз. Сир бўлмаса нималар ҳақида гаплашдингиз?
- Фақат ўйин ҳақида гаплашдик. Иккала голни ҳам консентрацияни йўқотиб қўйган пайтда ўтказиб юборганимизни муҳокама қилдик.

- Мусобақани секин бошлаб ҳар босқичда кучайиб бординглар.
- Агар Эрон терма жамоасини 10 дақиқада тўхтата олсак рақиб саросимага тушиб қолишини билардик. Улар дастлабки 5 дақиқада голлар уриб ўйин тақдирини ҳал қилиб қўйганди. Бугун имкон қадар кам хато қилиш ва гол ўтказмасликка ҳаракат қилдик. Иккинчи гол ўтказилган вазиятда шогирдларим бир неча сонияга бўшашишди. Бундан рақиб унумли фойдаланиб кетди.

- Таиланд мураббийи ҳакамлар тайинланиши ва мусобақа тақвимини танқид қилди. Сизнинг фикрларингиз қандай?
- Тўғриси мен ҳакамларнинг қандай тайинланишини билмайман. Бунга аралашмайман ҳам. Улар ўз ишини бажаришди. Биринчи навбатда Жаҳон чемпионатига чиқиш борасида тақвим адолатли бўлди. Ўтган Осиё чемпионатида чорак финалда кичик ҳисобда ютқазган жамоалар бешинчи йўлланмага эга бўлганди. Бу мусобақада эса адолатли тақвим бўлди. Плей-оффда ким кучли бўлса ўша ғолиб бўлди.

Нарзулла Сайдуллаев