Водий футболига қайта "жон" берамиз, "Одил Аҳмедов" академияси истеъдодларни саралаб олди

Расмий имтиҳонлардан бир ҳафта аввал Наманган вилояти футбол федерацияси билан ҳамкорликда 12та жамоадан 200 нафарга яқин футболчилар кўрикдан ўтказилди. Унда Фарғона, Андижон, Наманган вилоятларидан ташриф буюрган истеъдодлар қатнашдилар.  

Биринчи босқичга Дилшод Нуралиев бош-қош бўлган бўлса, якуний имтиҳонга шаҳсан Рауф Инилеев раҳбарлик қилди. Инилеев барча ёшдаги терма жамоаларда фаолият олиб борган мутахассис сифатида имтиҳонларнинг ҳалол ўтишини таъминлай олди.

Имтиҳонлар "Навбаҳор" стадионида бўлиб ўтди. Унда барча ота-оналар ва мухлислар ҳам қатнашиш имкониятига эга бўлдилар.

"Очиғи сўнгги 10 йилдан бери бундай сифатдаги ишни шаҳримизда кўрмай қўйгандим. Ҳукуматимз раҳбарлари, вилоятимиз раҳбари ва фахримиз Одил Аҳмедовга катта раҳмат. Шу йўл билан водийга аввалги сифат қайтариладиган бўлса, 7-8 йил кутишга тайёрмиз. Биз "Навбаҳор"ни камида "Насаф"га ўхшаб бир меъёрда ўйнайдиган клуб бўлишини истаймиз", - дейди ўзини Саидмурод деб таништирган мухлис.

"Учкўприкдан, бир эмас уч нафар боланинг "Одил Аҳмедов" академиясига кириши бизга бўлган талабни оширди. Мана энди ота-оналар яна бизга ишона бошладилар. Академияга кирган уч нафар боламизнинг иккитаси бундан 5 йил аввал Сергей Лушан томонидан "Бунёдкор" академиясига таклиф қилинганди. Афсуски, ота-оналарнинг имконияти йўқлиги туфайли улар пойтахтга бора олишмаган. Шунга қарамай, ўз устиларида ишлашда давом этдилар ва бугун улар юртимизда энг кучли академиялардан бири бўлиши кутилаётган коллежнинг илк қалдирғочига айландилар. Энди бизнинг туманимизда шу клуб аъзосига айланиш учун бошқаларда ҳам қизиқиш ошди. Мураббийларга ҳам яхши, бола тарбияласанг-у, етилганида футболни ташлаб кетса алам қиларкан", - дейди Учкўприк тумани БЎСМ мураббийи Равшан Мамажонов. 

Имтиҳон якунларига кўра, 15 нафар водийнинг истеъдодли фарзандлари сентябрь ойидан бошлаб янгича форматда таҳсил олишни бошлайдилар. Академия Тошкентда фаолиятини бошлаган "JFL Tashkent" болалар футбол клуби билан ҳамкорликда Германия, Испания ва Италия методикалари асосида фаолият олиб боради.