"Водий футболи": "Навбаҳор" иккинчи даврани дуранг билан бошлади

"Навбаҳор": Иккинчи даврани дуранг билан бошладик

Наманганнинг "Навбаҳор" клуби 16-турни Муборакда "Машъал" меҳмони бўлиб 2:2 ҳисобида дуранг ўйнади. Учрашув давомида "лочинлар" икки тўп фарқ билан олдинда боришди, бироқ "Машъал" иккита гол уриб ҳисобни тенглаштира олди. Баҳс сўнггида ярим ҳимоячи Азим Аҳмедов иккинчи сариқ карточка туфайли майдонни тарк этди. Биринчи бўлимнинг ўзида бош мураббий Бахтиёр Ашурматовга ҳам қизил карточка кўрсатилган эди.


"Нефтчи": Мурод Исмоилов: "Бу мавсумда ҳеч ким бизга иккитадан ортиқ гол ура олмаганди"

"Шўртан" - "Нефтчи" учрашувидан сўнг Мурод Исмоилов ўз фикрларини билдирди.

Ушбу учрашувдан олдин аҳамиятсиз муаммоларга дуч келган эдик, аммо улар ўта жиддий бўлиб чиқди. Сўнги ўйин олди ўтказилган машғулотларда асосий ҳимоячиларимиздан бири Жаҳонгир Меҳмонов жароҳат олиб жамоага ёрдам беролмаган бўлса, Мансур Саидов, Муҳсин Убайдуллаев ва Умид Қодиров каби уч нафар футболчимиз сариқ ва қизил карточкалар сабабли майдонга тушолмадилар. Шу сабабли, ҳимоя чизиғида тезкор равишда тартибни ўзгартиришимизга тўғри келди. Бу эса ўз ўрнида якуний натижага таъсир ўтказди.

Аммо бу баҳона бўла олмайди, чунки бундан олдин жорий чемпионатда бизга ҳеч ким иккитадан ортиқ гол урмаган эди. Орқа ва олди чизиқларда катта хатоларга йўл қўйганимиз етмагандек, бирор бир жиддий вазият ҳам яратолмадик. Бу ҳаракатларимиз билан “Шўртан” га олдинга юриш учун катта туртки бериб қўйдик ва рақибимиз бундай имкониятлардан самарали фойдаланиб очиқ ўйин кўрсатди. Натижа ҳам адолатли бўлди деб ўйлайман. Биз эса ҳатоларимиз устида кўп ишлашимиз зарур, чунки бизларни олдинда анча оғир ўйинлар ва кучли рақиблар кутиб турибди.


"Андижон": Вуйович ва Анвар Бердиев тиббий кўрикдан ўта олмагани сабаб "Насаф"га қарши ўйнай олмади

Эдгар Гесс бошчилигидаги "Андижон" клуби 16-турда "Насаф"га ютқазиб қўйди. Ушбу баҳсда мезбонлар сафида Предраг Вуйович ва Анвар Бердиев ўйнашмади. Бунга футболчилар давралар оралиғидаги тиббий кўрикдан ўта олишмагани сабаб қилиб кўрсатилди.

Иккала футболчи ҳам қайтадан тиббий кўрикдан ўтади. Агар шифокорлар рухсат беришса улар яна майдонга қайтишади.


"Қўқон-1912": Отақўзиев клуб сафида дублга эришган илк футболчи

"Қўқон-1912" иккинчи давранинг илк учрашувини ўз майдонида "Динамо"га қарши ўтказиб 3:1 ҳисобида ғалаба қозонди. Ушбу баҳсда мезбонлар ҳужумчиси Носир Отақўзиев дублга эришди. Таъкидлаш лозимки, 2015 йилги мавсумда қўқонликлар сафид ҳеч қайси футболчи бир ўйинда иккита гол урмаган эди. Айнан Отақўзиев 6та гол билан клуб тўпурари бўлиб турибди.

Носир Отақўзиев сўнгги бор олий лигада 2013 йилнинг 21 сентябрь кунида "Нефтчи" таркибида "Гулистон" билан баҳсда дублга эришган эди.