"Водий футболи". Жавоҳир Расулов жароҳат олди

"Қўқон-1912": Жамоа бугун йиғилади

"Сўғдиёна"га қарши баҳсдан сўнг қўқонликлар бугун ўз қароргоҳида йиғилади. Рустам Абдуллаев бошқарувидаги жамоа 19 апрель, жума куни ўз майдонида "Нефтчи"ни қабул қилади. Бўлажак баҳсга тайёргарлик бошланди. Айтиш лозимки, дербида жамоанинг асосий ўйинчиларидан бири бўлган Сардор Эминов дисквалификация туфайли "Нефтчи" билан баҳсни ўтказиб юборади.



"Нефтчи": Жавоҳир Расулов жароҳат олди

Хабарингиз бор, Фарғонанинг "Нефтчи" клуби ўтган куни икки томонлама назорат учрашувини ўтказди. Ушбу баҳсда ярим ҳимоячи Жавоҳир Расулов жароҳат олди. Футболчи Тошкентда тиббий кўрикдан ўтади, шундан сўнг унинг жароҳати қанчалик жиддийлиги маълум бўлади.

Бугун жамоа 18:00да Қиргулидаги стадионда машғулот ўтказади.



"Андижон": Асқаралиев ва Отахонов масаласи эртага ҳал этилади

Кеча жамоанинг ёшлари ва ўйин амалиётига кам эга бўлаётган футболчилари Андижон Олимпия Захиралари Коллежи табрияланувчиларига қарши ўртоқлик учрашуви ўтказишди. Баҳсда "Андижон" 6:2 ҳисобида зафар қучди.

Жамоа бугун 18:00да "Соғлом Авлод" стадионида машғулот ўтказади. Унда Санжар Асқаралиев ва Иброҳим Отахонов ҳам қатнашади. Бу икки футболчи борасида ПФЛнинг қарори эртага маълум бўлади.