Виталий Левченко: "Суперлигадаги барча клублар ҳурматга лойиқ"

- Ўйин ҳақида фикрингиз?

- Тахмин қилганимиздек, рақиб жамоада мотивация юқори бўлди. Чунки "Шўртан" Суперлигада қолиш учун кураш олиб бормоқда. Ўз навбатида биз ҳам чемпионликка ҳаракат қиляпмиз ва ҳар бир баҳс муҳим саналади. Ғалаба қозонганимиздан хурсандман, олдинга қараб ишлашда давом этамиз.

- Ўйиннинг бошидаёқ Жоэль Кожонинг жароҳат олиб майдонни тарк этиши қандай таъсир қилди?

- Албатта, бу яхши иш бўлмади. Чунки ҳеч ким жароҳат олишни хоҳламайди. Айниқса бизнинг ҳозирги вазиятда ҳар бир жароҳат катта йўқотиш ҳисобланади. Биз учун ҳар бир ўйинчимиз муҳим. Энди Кожо оёғини МРТ қилдиради ва шундан сўнг шифокорлар ташхисини кутамиз. Унга соғлик тилаб қоламан.

- Бугун жамоангиз ғалаба қозонади. Лекин статистика шуни кўрсатяптики, "Шўртан" доим "Нефтчи" учун ноқулай рақиб бўлган. Сизнингча, "Нефтчи"нинг ноқулай рақиби ким?

- Суперлигадаги барча клублар ҳурматга лойиқ. "Шўртан"ни ҳам ҳурмат қиламиз. Улар жиддий қаршилик кўрсата олишди. Ўз навбатида биз ҳам ҳар бир рақибга нисбатан ҳурматда бўляпмиз. Бугун ҳужумда энг яхши жиҳатларимизни намоён эта олдик. Ғалаба учун йигитларга раҳмат айтаман.

- Захирадан тушганлар ўйин режасига қанчалик таъсир қилди?

- Шуни айтишим керак, мен футболчиларни асосий ва захира ўйинчисига ажратмайман. Биз - бир жамоамиз ва исталган футболчи исталган пайтда майдонга тушиб жамоага ёрдам бериши керак. Клубимиздаги ҳамма профессионал.