Виктор Кумиков - май ойининг энг яхши мураббийи

Баҳор фаслининг сўнгги ойида "Олмалиқ" олий лигада тўртта ўйин ўтказиб умуман мағлубиятга учрагани йўқ. Дастлаб жамоа ўз майдонида Самарқанднинг "Динамо" клуби устидан 2:0 ҳисобида ғалабага эришди.

Муборакда номдор клублар мағлубиятга учраб қайтаётган бир пайтда "Олмалиқ" сафарда "Машъал" билан дуранг қайд эта олди - 0:0.

Тошкент вилояти дербисида "Металлург" 1:0 ҳисобида мағлуб этишди. Ниҳоят ойнинг охирги ўйинида "Олмалиқ" Ғузорда "Шўртан"ни таслим қилиб қайтишнинг уддасидан чиқди.

Эътибор қилганингиздек, ўтган ойда Кумиков шогирдлари олий лигада ўз дарвозасидан умуман гол ўтказгани йўқ. Бошқа ҳеч бир клуб ўтган ой бундай натижа билан мақтана олмади.

Ўтган ойда "Локомотив" мураббийлар штаби, Жасур Абдураимов "Пахтакор" ва Нўъмон Ҳасанов "Қўқон-1912" ҳам анча яхши ишлашди.

Эслатиб ўтамиз, март ойида олий лигада "Динамо" мураббийлар штаби, апрель ойида "Қўқон-1912" устози Нўъмон Ҳасанов энг яхши бўлишганди.