Вадим Абрамов: "ОЧЛ финалчисига қарши ўйнаш қизиқарли бўлади"

Ўзбекистон Кубоги соҳиби "Локомотив" ўз гуруҳида Эроннинг "Фулад", Саудия Арабистонининг "Ал Ҳилол" ҳамда плей-оффдан чиққан жамоага қарши баҳс олиб боради. Қуръа борасида "темирйўлчилар" бош мураббийи Вадим Абрамовнинг фикрлари билан қизиқдик.

- Қуръа натижаларидан хабар топдим. Кучли гуруҳга тушдик деб ўйлайман. Дастлабки беллашувни сафарда "Ал Ҳилол"га қарши ўтказамиз. Албатта, Осиё чемпионлар лигаси финалчиси билан ўйинлар ўзига яраша қизиқарли кечишига шубҳа йўқ. "Фулад" ҳам ўзига яраша кучли клуб ҳисобланади. Таркибда Эрон терма жамоасининг бир нечта аъзолари бор. Яна бир рақибимиз менимча, Қатарнинг "Ал Жаиш" клуби бўлади.

- "Локомотив"нинг янги мавсумга тайёргарлиги қачондан бошланади?
- 20 декабрь куни Тошкентда йиғиламиз ва 6 январгача шу ерда бўламиз. Кейин эса икки ҳафталик йиғин ўтказиш учун БААга йўл оламиз ва у ерда тўртта назорат баҳси ўтказамиз.

- "Олмалиқ"дан Санжар Шоаҳмедовнинг жамоангизга ўтаётганини эшитдик.
- Ҳа, шундай гаплар йўқ эмас. Ҳозирча бу футболчи билан оғзаки келишув кетяпти, лекин шартнома тузганимиз йўқ.

- Виктор Карпенконинг клубдан кетаётгани ростми?
- Буни Карпенконинг ўзидан сўраш керак. У жамоада қоладими-йўқми, бир нарса дея олмайман. 20 декабрда йиғилайлик, шундан сўнг маълум бўлади.