Вадим Абрамов: "Гейнрих мухлисларга ёқадиган ўйин кўрсата олади"

"Жамоамизга келган янги футболчилар тезда мослашиб кетишди. Бунга Австриядаги йиғин ёрдам берди. Қолаверса бу футболчилар менинг услубимни яхши билишади", - дейди Абрамов.

- Жамоада сардор ўзгардими ёки Карпенко майдонга тушмагани учун Тўхтахўжаев бу вазифани бажардими?
- Ҳа Ислом бизнинг вице-сардоримиз. Карпенко тушса Виктор сардор бўлади.

- Сиз Давлат Турдалиев билан яхши таниш эдингиз. У ҳақда қисқача фикрларингиз борми?
- У билан 2007 йил Австриядаги йиғин вақтида танишгандим. Турдалиевда бир кишида камдан-кам бўлган икки жиҳат мужассам эди: Инсонийлик ва мутахассислик. Афсуски у энди орамизда йўқ.

- Жамоада биронта легионер қолмади...
- Сабаби ўзимизнинг йигитлар улардан кучли. Аввал ҳам шуни айтганман.

- Шоғуломвни бугун ўйинга тайёр эканлиги учун майдонга тушурдингизми ёки рақиб кучини инобатга олибми?
- Унинг имкониятларини яхши билардим, рақибдан келиб чиқиб шундай таркибни танладим. Уни келажак учун харид қилдик десак ҳам бўлади.

- Гейнрихнинг ўйини чиқаверса чемпионлик қўлга киритиладими?
- Гейнрихсиз ҳам анча очко тўплаб қўйдик. Саша мухлислар учун ўйнашни билади. Шоу қилишга уста футболчи. Бу эса мухлисларга ёқади.

- 10 августга қадар трансфер ойнаси очиқ. Яна ўзгаришлар бўладими?
- Ҳозир аниқ гап айта олмайман. Жамоадаги футболчилар ўйин амалиётисиз қолиб кетмаслигини истайман.