Вадим Абрамов: "Футболчилар ғалаба қозонишмоқда, аммо ҳозирча маош олиш насиб этмаяпти"

"Иккита ғалаба қозонишни истаган жамоа ўйнади. Менимча мухлисларга ёқадиган ўйин бўлди.

Ёмғир халал бергани йўқ. Бу ерда майса баланд шу боис тўп тезроқ юрди. Ёмғирда ҳам ўйнашни билиш керак. Албатта бундай ҳолатда бошқачароқ ўйналади, бу футболчиларга у қадар катта муаммо бўлмади.

Ўртоқлик учрашувида ҳам АГМКни ютгандик? Икки ўйинни солиштириш тўғри эмас. Таркиблар ҳам ўзгача эди. Расмий ўйин барибир бошқача. Гол урганимиздан кейин яна шундай давом этиш ўрнига ҳисобни сақлаб қолишга уринамиз.

Очколар йиғишда давом этаётганимиз албатта қониқарли. Ўз майдонимизда ҳали умуман ўйнамадик. Олдинда яна иккита сафар баҳси кутиб турибди.

Футболчилар ғалаба қозонишмоқда, аммо ҳозирча маош олиш насиб этмаяпти. Балки яқин вақт ичида бу нарса бўлади ва йигитлар янада кўпроқ куч билан ўйнашда давом этишади.

Зуҳуров тажрибали дарвозабон. Унга алоҳида раҳмат. У ўзининг босиқлиги билан жамоага ишонч бағишлаб турди. Кейинги ўйинларда ҳам шундай ўйнашини тилайман", - дейди Вадим Абрамов.

"Чиройли ўйин бўлди деб ўйлайман. Икки жамоа ҳам 3 очко учун курашди. Ғалаба қозонганимиздан хурсандман. Кейинги ўйинларда АГМКга омад тилайман. Ёмғир ёққани туфайли тўп тез ҳаракат қилади, аксинча бунинг фойдаси бўлди деб ўйлайман", - дейди ўйиннинг энг яхши футболчиси Лутфулла Тўраев.