"UZREPORTTV"да Евро-2016 ўйинларини кимлар шарҳлайди?

Телеканалнинг "Фейсбук"даги саҳифаси берган маълумотга кўра, Евро-2016 учрашувларининг ўзбек тилидаги шарҳларини Алишер Узоқов, Ёқубжон Бобожонов, Санжар Ризаев ва Даврон Файзиевлар олиб боради.

Бундан ташқари Ўзбекистон телевиденияси тарихида илк маротаба Евро-2016 баҳслари бир вақтнинг ўзида 2 тилда шарҳлаб борилади (ўзбек ва рус). "Ўзбектелеком"нинг IPTV хизматидан фойдаланувчилар пульт орқали телевизор ёки тюнердаги махсус бўлимга кириб, ўзлари истаган аудио канални танлаб, Евро-2016 ўйинларини ўзбек ёки рус тилидаги шарҳда томоша қилишлари мумкин бўлади.

Рус тилидаги шарҳлар эса Отабек Жўраев, Жасурбек Ғайбуллаев, 2010 йил Россиянинг "НТВ Плюс" телеканали томонидан ўтказилган шарҳловчилар конкурсида финалга қадар етиб борган ҳамюртимиз Азиз Ғуломов ва яқиндагина 50 ёшини қаршилаган машҳур футбол юлдузи, 12 Осиё ўйинлари ғолиби Азамат Абдураимовлар томонидан олиб борилади.

Шу билан бирга Россиянинг "МАТЧ ТВ" телеканили таниқли шарҳловчиси Александр Елагин юртимизга ташриф буюрган ҳолда, Евро-2016 ўйинларини плей-офф босқичидан бошлаб финалга қадар "UZREPORTTV" телеканали орқали шарҳлаб боради.