UZREPORT TV Чемпионлар лигаси ўйинларини тўғридан-тўғри эфирда кўрсатади (батафсил)

Канал харид қилган пакетда, ўйинлар трансляцияси, "Highlights" (хавфли вазиятлар), "Magazines" (турнирга оид кўрсатувлар) бўлимлари мавжуд. Бу мавсумнинг тўғридан-тўғри трансляциялари Чемпионлар лигаси гуруҳ босқичидан бошлаб "UZREPORT TV" телеканалида кўрсатилади.

Шуни қайд этиш жоизки, "UZREPORT" ахборот агентлиги Ўзбекистонда Чемпионлар лигаси ўйинларини кўрсатиш ҳуқуқини қўлга киритган биринчи агентликдир.

"Бу муваффақият  SARAN MEDIA вакиллари билан ўтган музокаралар маҳсули. Бу йили "UZREPORT TV" ўзининг янги консепциясини тасдиқлади, унда соғлом ҳаёт тарзини ривожлантириш ва телемухлисларнинг спортга бўлга қизиқишини орттириш кўзда тутилган. УЕФА Чемпионлар лигаси ўйинларини тўғридан-тўғри кўрсатиш медиа-ҳуқуқини қўлга киритишимиз телеканалимиз аудиторияси кенгайишига хизмат қилади деган умиддаман" - дейди агентлик бош директори Равшан Жўраев.

"Тўғридан-тўғри трансляциялардан ташқари "UZREPORT TV" телеканалида "Highlights" - ўтган ўйинларнинг хавфли вазиятлари ва "Magazine" турнирга оид кўрсатувлар намойиш этилади" - дейди "UZREPORT TV" бош муҳаррири Дилшод Султонов.

27 август куни Монакода Чемпионлар лигасининг гуруҳ босқичига қурьа ташланади. "UZREPORT TV" каналида УЕФА Чемпионлар лигаси ўйинлари 15 сентябрдан эфирга узатилади.

Айни дамда "UZREPORT TV" тўғридан-тўғри трансляциялар учун шарҳловчиларни танловини амалга оширмоқда.