Умарали Раҳмоналиев: "Бизни қийнаб келаётган муаммога яна дуч келдик"

"Ўйин қизғин руҳда ўтди. Жамоамиз ҳужумкор ўйин кўрсатди. Бизни қийнаб келаётган муаммога яна дуч келдик, яъни вазиятларни якунига етказишда оқсадик. Ушбу камчилигимиз устида ишлашга тўғри келади. Ушбу нуқсон ўйин давомида ҳам бизга панд берди. Кейинги ўйинларда вазиятлардан максимум фойдаланишга ҳаракат қиламиз. Рақибнинг шундай ўйин намойиш этишини кутгандик ва жамоамиз билан тайёргарлик кўргандик. Чунки рақиб жамоа ҳисобида уч очко мавжуд эди ва уларни дуранг ҳам қониқтирарди. Шу сабабли, Янги Зеландия ҳимоявий ўйин кўрсатиши аъён эди. Иккинчи бўлимда улар шундай ўйин намойиш этишди ҳам. 

Отабек Боймуродов бор маҳоратини ишга солган ҳолда ҳаракат қилмоқда. Унга ҳеч қандай шикоятимиз йўқ. Тўғри, ўтказиб юборилган биринчи голда нимадир қилиши мумкин эди, бироқ иккинчи голни қайтаришнинг имкони йўқ эди. Чунки рақиб футболчиси томонидан тепилган тўп олис бурчакка йўлланган эди. 

Янги Зеландиянинг ҳимояга таяниб зичлашган ҳолда ҳаракат қилиши, қолаверса, қарши ҳужумларга чиқиш ҳолатларини юқори баҳолайман", деди ёшлар жамоамиз сардори.