"Уик-энд" оқшомини Европа футболи билан ўтказинг (анонс)

Бу галги "уик-энд" бизга катта афишали ўйинларни ваъда қилмасада, бир қатор қизиқарли ва кутилмаган натижаларга бой учрашувларни туҳфа қилишини тахмин қилиш мумкин.

Нафақат А Сериянинг, балки ҳафтанинг энг марказий ўйинига даъвогар "Милан" - "Рома" учрашуви бугуноқ футбол ишқибозларини экран қаршисига яқинлаштиришга мажбур этади.

Ўзгача бошланган Италия чемпионати кетма-кет учинчи турдирки бизга марказий, қизиқарли ва ниҳоятда драматик баҳсларни тақдим этмоқда. Роналдунинг келиши, эътиборни ошгани ва том маънода янада профессионалликка интилаётган А Сериянинг ўзгаришлари кўпчиликка илиқ таассурот қолдираётгани сир эмас. "Камбэк"лар чемпионатига айланиб қолган А Сериядаги бугунги баҳсни ўтказиб юбориш жуда мушкул.

"Милан" чемпионатнинг биринчи турини ўтказиб юборганидан хабардорсиз албатта. Ўтган ҳафта эса иккинчи турдан янги мавсумга киришган "Милан" учун Неаполь сафари муваффақиятли чиқмади. Гаттузо жамоаси иккита тўп фарқини осонгина қўлдан чиқаргани ва тайёр ғалабадан мосуво қолгани уларни "Рома"га қарши баҳсда янада сергакроқ қилиши аниқ.

Турин сафаридан муҳим ғалаба билан қайтган "Рома" ҳам иккинчи турда деярли "Милан"нинг аҳволига тушиб қолди. Фарқ шундаки, жамоа мағлубиятга учрай туриб баҳс сўнггида ирода намойиш қилди. Натижада Ди Франческо шогирдлари шармандали натижани дурангга айлантиришни уддасидан чиқишди.

Миланда бугун ўтган турда иккита тўп фарқидаги устунликни бой берган ва аксинча, иккита тўп фарқини йўққа чиқарган жамоалар тўқнашуви гувоҳига айланамиз.

Эртага эса "Интер" футболчилик пайтида кўп азият чеккан собиқ ҳужумчи Филиппо Инзаги бошқарувидаги "Болонья" меҳмони бўлади. "Ювентус" эса "Парма" билан ўйнаш учун сафарга отланади.

А Сериядаги яна бир қизғин беллашув "Фиорентина" ва "Удинезе" ўртасида кечади. Анчелотти қўл остида кетма-кет иккита иродали ғалабаларни тантана қилган "Наполи" эса Генуяга сафар қилади.

Пешқадамлар қаторида кетаётган СПАЛ эса Туринда "Ювентус"нинг қўшниси "Торино" билан ўйнайди.

Германия Бундеслигасида ҳам тур ўйинларига бугун старт берилади. "Ганновер" - "Боруссия" Дортмунд ўртасидаги баҳс билан бошланадиган тур ўйини қизиқарли ўтишини кутиш мумкин. Чунки бу иккала жамоаларнинг Ганноверда ўтадиган ўйинлари одатда голларга бой тарзда кечади.

"Бавария" эртага "Штутгарт" билан баҳс бойлайди. Турнинг марказий учрашуви "Байер" ҳамда "Вольфсбург" ўртасида бўлиб ўтади.  Гельзеркирхеннинг "Шальке" жамоаси биринчи турдаги мағлубият аламини "Герта"дан олишга уриниб кўради.

Испания примеросида ҳам тур ўйинлари бугунги "Хетафе" ҳамда "Вальядолид" ўртасидаги учрашув билан старт олади. Ла Лиганинг учинчи турида эртага "Реал" "Леганес"ни қабул қилса, якшанба куни "Барселона" дебютант "Уэска" билан Каталонияда тўқнашади. "Атлетико" эса "Сельта" билан меҳмонда баҳс юритади.

Англия премьер лигасида тур ўйинлари доимгидек шанба куни бошланади. Бу гал АПЛда ҳам том маънодаги марказий тўқнашувлар ёки афишаси каттароқ ўйин йўқ. Йўқотишларсиз кетаётган "Ливерпуль" бу ҳафта "Лестер" меҳмонига айланади. Сарри бошчилик қилаётган "Челси" эса "Борнмут"ни ўз уйида қабул қилади. Ўтган турда очко йўқотиб қўйган амалдаги чемпион "Сити" эса Бенитез бошчилигидаги "Ньюкасл"ни синовдан ўтказади. Унаи Эмери қўл остида ниҳоят ғалаба таъмини сезган "Арсенал" "Кардифф" билан сафарда ўйнайди. "Тоттенхэм"дан Манчестерда "тарсаки" еган "Юнайтед" эса "Бёрнли" уйида меҳмон бўлади. Ўтган ҳафта Манчестерда учта гол урган "Тоттенхэм" эса "Уотфорд"ни ҳам мағлуб этишга уриниб кўради.

Франция Лига 1 чемпионатида тур ўйинлари "Лион" - "Ницца" учрашуви орқали бугун бошланади. ПСЖ эртага "Ним" майдонида меҳмон бўлса, турнинг марказий баҳси якшанба куни кечқурун "Монако" ва "Марсель" ўртасида кечади.

Бонус сифатида мазкур "кучли бешлик"даги ўйинларга қўшимча қилиб Россия чемпионати доирасидаги "Зенит" ҳамда "Спартак" жамоаларининг ўзаро тўқнашувини кўришни тавсия қиламиз. Ҳозирги кунда Россия футболидаги биринчи рақамли футболчи бўлиб турган Артём Дзюба ўзининг собиқ жамоасига қарши майдонга тушади.

"Уик-энд"нинг муҳим учрашувларининг трансляция жадвали