Уганда бош мураббийи Милутин Средоевич: "Ўзбекистон - Осиё футболининг ўчоғи"

"Биринчи навбатда ЎФАга ушбу мусобақага бизни таклиф қилишгани учун ўз миннатдорчилигимни билдираман. Ушбу мусобақа бўлажак расмий мусобақаларга тайёргарлик вазифани ўтаб беради деб ўйлайман", - деди Милутин Средоевич.

- Ушбу мусобақадаги жамоаларнинг имкониятларини қандай баҳолайсиз? 

- Бир фактни айтиб ўтишим керакки, Ўзбекистон Осиё футболининг ўчоғи ҳисобланади. Сречко Катанец Словения терма жамоаси билан Жаҳон чемпионатида иштирок этгани унинг қандай кучли мураббийлигини кўрсатиб турибди. 

Эртанги рақибимиз Тожикистонга қарши бор кучимиз билан ўйнаб ғалаба қозонишга ҳаракат қиламиз. Петар Сегрт Юрген Клопп билан бирга битта мураббийлик мактабида ўқиган. У кўплаб шогирдларни етиштириб берган. Ўзбекистон ва Уганда иқлими фарқли, агар эртага шу нарса бизга ҳалал бермаса ғалаба қозона оламиз. 

- Наманганга барча кучли футболчиларни олиб келдингизми ёки жароҳат олганлар борми? 

- Жароҳат олганлар бор, аммо мен улар ҳақида айтиб, йиғлаб ўтиришни хоҳламайман. Таркибимизда бор футболчилар билан ўйнаймиз. 

- Нима учун асосан Африкада фаолият олиб борасиз? 

- Сербияда жуда самарали фаолият олиб борганман. Африкадан таклиф тушди ва уни қабул қилдим. Бу ердаги 20 йиллик фаолиятимда 17та соврин ютдим. Саудия Арабистони ва бошқа араб давлатларидан таклифларни рад қилганман. Африкалик футболчиларга меҳр тарқатаман ва уларни юқори даражага олиб чиқишга ҳаракат қиламан.