Уэйн Руни жаҳон чемпионатига боришдан аввал руҳшунос қабулида бўлади

Бу ҳақда The Guardian нашри хабар бермоқда.

Футболчи саккиз учрашувдан бери давом этаётган ўзининг голсиз сериясига барҳам бериш ниятида. Футболчи Португалияда ташкил этиладиган машғулотларни якунлаганидан сўнг, миллий терма жамоа руҳшуноси қабулига боради.

«Мен руҳшунос билан гаплашиб кўрмоқчиман, кўрамиз, бундан қандай наф чиқаркан. Авваллари ҳеч қачон бундай ишга қўл урмаганман, лекин бундан зарар кўрмаслигим аниқ. Мен яна аввалги савиямда ўйин кўрсата олишимни исботлашни хоҳлайман. 2018 йилга бориб ёшим катталашиб қолади, шунинг учун бу мен учун сўнгги энг катта мусобақадир», – деди Руни.

Шунингдек, футболчи Бразилияда бўлиб ўтадиган мусобақага ўз жисмоний ҳолатини анча яхшилаб олган ҳолда боришга ишонч билдирди.

Футбол бўйича жаҳон чемпионати баҳслари 12 июндан 13 июлга қадар давом этади. Англия терма жамоаси мусобақанинг «D» гуруҳида Уругвай, Коста-Рика ва Италия терма жамоаларига қарши баҳс олиб боради.