U-17 Жаҳон чемпионати. Интизомли, мустаҳкам ва самарали жамоа — Ўзбекистоннинг бўлажак рақиби ҳақида

Биз учун навбатдаги рақиб — ёшлар футбол мактаби ва интизоми билан ном чиқарган Хорватия терма жамоаси. Бу беллашув нафақат мусобақадаги йўлни давом эттириш учун, балки Ўзбекистон ёшлар футболи қай даражада ўсганини кўрсатадиган катта имкониятдир.

Тажрибали рақиб: Хорватиянинг мундиал тарихи

Хорватия U-17 терма жамоаси бу сафар Жаҳон чемпионатида тўртинчи марта иштирок этмоқда.

2001 ва 2013 йилларда улар гуруҳ босқичидан чиқа олмаган.

2015 йилда эса чорак финалгача етган — бугунга қадар энг яхши натижаси шу ҳисобланади.

Демак, улар бу сафар ҳам ана шу босқични камида такрорлашни, балки уни ортда қолдиришни ният қилган.

Хорватия футбол тизимида ёшлар тайёрловига катта эътибор берилади. Улар футбол мактабларида жисмоний тайёргарлик билан бирга техник мукаммалик, ўйин ўқиши ва интизомга алоҳида аҳамият қаратишади. Шунинг учун ҳам уларнинг жамоалари, ҳатто ўсмирлар даражасида ҳам, “катталарча” фикрлайди ва жамоавий ҳаракатда юксак маданият намойиш этади.

Гуруҳ босқичи: ишонарли ўйин ва мустаҳкам ҳимоя

Қатардаги Жаҳон чемпионатида хорватияликлар “С” гуруҳида Сенегал, Коста-Рика ва БАА билан бир квартетдан ўрин олишди. Улар гуруҳда анча ишончли ўйин кўрсатишди ва етти очко жамғариб, 1/16 финалга муносиб йўл олишди.

Гуруҳ баҳслари натижалари

Сенегал – Хорватия 0:0

Мустаҳкам ҳимоя ва интизомли ўйин билан дуранг.

БАА – Хорватия 0:3

Голлар: Кусанович, Сивалеч, Радос.

Бу учрашувда хорватияликлар тўлиқ устунликни намойиш этишди — нафақат ҳисоб, балки ўйин томонлама ҳам ўзларини кўрсатишди.

Хорватия – Коста-Рика 3:1

Голлар: Радос, Кумар, Кусанович.

Бу баҳсда улар ҳужумдаги самарадорлик ва реализация кучини кўрсатишди.

Умуман, 3 та ўйинда 6 та гол урган, бор-йўғи 1 та тўпни дарвозасига киритиб юборган жамоа ҳимоя ва ҳужумдаги мувозанатни аъло даражада сақлай олганини кўрсатди.

Интизом ва тартиб — Хорватия услубининг асоси

Хорватия ўсмирлари нафақат техник, балки интизомли жамоа сифатида ҳам ажралиб туради. Улар гуруҳ босқичида бор-йўғи 3 та сариқ карточка олишган. Бу рақам жамоанинг ўйиндаги тартиби ва хиссий барқарорлигини яққол кўрсатади.

Шу боис, Ўзбекистон ўсмирлари майдонда нафақат куч билан, балки ақл билан ҳам ўйнаши лозим бўлади. Интизом ва диққатни йўқотмаслик — бу ўйиннинг энг муҳим омилларидан бири.

Ўзбекистон сафида кимларда сариқ карточка бор?

Ўзбекистон U-17 терма жамоаси ҳам гуруҳ босқичида ишонарли ўйин кўрсатди ва мухлисларда ишонч уйғотди. Энди уларни жиддий синов кутмоқда.

Таркибдаги Миразиз Абдукаримов, Муҳаммад Ҳабибуллаев, Азизбек Абдумўминов, Жамшидбек Рустамов, Муҳаммад Ҳакимов, Садриддин Ҳасанов, Муҳаммадали Мусахонов, Асилбек Алиев ва Абдумалик Анваров каби йигитлар бу босқичда жавобгарликни янада ҳис қилиши керак бўлади, чунки улар ҳисобида биттадан сариқ карточка бор. 

Энг муҳим янгилик — Нурбек Сарсенбаевнинг сафга қайтиши. U-17 Осиё Кубоги финалида олган қизил карточкаси учун 3 та ўйинга дисквалификация қилинган Сарсенбаев энди майдонга қайтиб, ҳужумдаги самарадорликни оширса ҳеч гап эмас. Унинг тезкорлиги ва ҳужумдаги хатарли юришлари рақиб ҳимоясини жиддий синовдан ўтказиши мумкин.

Нималар ҳал қилувчи бўлади?

Хорватия билан баҳсда бир нечта омил ҳал қилувчи аҳамият касб этади:

1. Биринчидан, рақибнинг ҳимоядаги интизомига қарши сабр ва тезкорлик билан ҳаракат қилиш.

2. Иккинчидан, стандарт вазиятлар — айниқса бурчакдан тўп оширишларда диққатлироқ бўлиш лозим. Хорватия бу орқали кўп имконият яратади.

3. Учинчидан, ҳиссий барқарорлик. Ёшлар мусобақасида кўпинча хиссиёт устун келади — бу ерда хиссиётни назорат қилиш жуда муҳим.

Хулоса: имконият бор — фақат ишониш керак

Хорватия жамоаси синовли рақиб, лекин мағлуб этилмас жамоа эмас. Ўзбекистон ўсмирлари кейинги босқич йўлини очиш учун етарлича куч, ишонч ва бирдамликка эга. Футболда фақат тажриба эмас, юқори иштиёқ ва ишонч ҳам ғалаба келтиради. Бу беллашув — бизнинг ёшларимиз учун тажриба, катта имконият ва буюк мақсад йўлида давом этиш имконини беради.