Турсунбой Ҳусанов: “Ҳакам иккинчи сариқни бермаса ҳам бўларди”

“Қўқон-1912”га қарши ўйинга юқори даражада тайёргарлик кўргандик. Учрашувдан бир кун олдин, Қўқонга бориб ўйинолди машғулотини ўтказган холда, астойдил ҳозирлик кўрилганди. Очиғи, илгари бундай бўлмаганди. Шундан ҳам билса бўладики, жамоамизнинг мақсади жиддий эди. Афсуски минглаб ишқибозларимизни хурсанд қила олмадик.

Ўйинга келадиган бўлсак, водий дербисида ҳақиқий жанг кечади. Шундай бўлиши аввалдан маълум эди. Рақиб жамоа ҳам ўз уйида ютқазмасликка бор кучи билан харакат қилди. Менимча ўйин ташкил этиш борасида “Андижон” мезбонлардан сира қолишмади.

Ўтказиб юборилган биргина гол, харакатларимизни чиппакка чиқади. Гол бўлган вазиятни нима деб изоҳлаш мумкин? Биласизми бу каби ўйинларда ким биринчи гол урса ютиб кетади. Шу боис биз ҳам асосий эътиборни ҳисобни очиб олишга қаратдик. Қўқонликлар эса қарши ҳужумдан унумли фойдаланиб қолишди. Шундан кейин ҳам бизда ҳисобни тенглаштириш учун бир неча маротаба имконият юзга келди. Аммо бирозгина аниқлик етишмади.

Қизил карточкага келадиган бўлсак. Ундан сариқ карточка олгандим. Шунга қарамай ўйинни жангавор тарзда ўтказишга харакат қилдим. Бундай жангавор курашларга бой тарзда кечадиган учрашувларда биринчи сариқ карточкадан сўнг ўзингизни эхтиёт қилиб ўйнасангиз бўлмайди. Шунинг учун мен ҳам курашдан қочмасдан, астойдил харакат қилдим. Очиғи, иккинчи сариқ карточкани бош ҳакам бермаса ҳам бўларди. Биринчисига эса эътироз бўлиши мумкин эмас. Менимча учрашувда Андижонда бўлганида иккинчи сариқ карточка кўрсатилмасди.   

Қизил карточка олиб жамоани қийин аҳволга солиб қўйганимдан афсусдаман. Бунинг учун раҳбарият, мураббийлар ва бутун жамоадан узур сўрайман. Айниқса ишқибозлардан. Менимча ҳеч ким бундай ўйинларда атайин қизил карточка оламан деб харакат қилмайди. Афсуски мен билан шундай холат юз берди.

Энди кейинги турда “Андижон”ни яна бир жиддий ўйин кутиб турибди. Яна водий дербиси. Бу сафар “Нефтчи”ни қабул қиламиз. Жамоадошларимга ишонаман. Улар насиб қилса ўз уйимизда ғалаба қозона оладилар.

"Андижон" мутбуот хизмати