Тони Пулис: "ВАР кўрилиши икки дақиқадан ошмасин ва соф ўйин вақтини жорий этиш керак"

"Менимча, асосий муаммо шундаки, ҳакамлар ва ВАР футболнинг ўзига қараганда муҳимроқ бўлиб қолган. ВАР тизимини назорат остига олиш керак. У барибир қолади, аммо уни қўллаш усулини ўзгартириш лозим.

Биз кўп бор баҳсли вазиятларни видеоқайдда кўриб, бир зумда хулоса чиқарганмиз, аммо ВАРнинг шу қарорга келишини кутганимизга икки-уч дақиқа — ёки ундан ҳам кўпроқ вақт кетган.

Мен бир нарсани ўзгартирган бўлардим — ВАР кўрилиши ҳар қандай вазиятда икки дақиқадан ошмаслиги керак. Агар ҳакамлар хонанасидагилар шу вақт ичида қарор чиқара олмаса, демак, уларнинг ўша ерда бўлиши шарт эмас.

Шунингдек, ҳар бир ҳакамлар хонасида собиқ профессионаллар — мураббий ёки футболчи, шунингдек ВАР ҳаками ва унинг ёрдамчиси бўлиши керак. Профессионал футболчи барча қоидаларни билмаслиги мумкин, лекин у ўйинни ҳис этади ва қандай ўйнашни яхши тушунади.

Яна бир ўзгартириш — соф ўйин вақтини жорий этиш. Ҳар бир ўйинда жароҳатлар, ВАР ёки вақтни чўзиш сабабли соатни тўхтатиш имкони бўлиши керак.

Шунда ҳар бир мухлис майдонда қанча вақт қолганини билиб туради ва энди ўйин охирида неча дақиқа қўшилишини тахмин қилишга ҳожат қолмайди.

Мен АПЛда ишлаган пайтларимда бу ҳолатга кўп кулганман, чунки агар биз кучли жамоаларни ютаётган бўлсак, 5 дақиқадан кўп қўшишарди, лекин агар мағлуб бўлсак, 3 дақиқадан ҳам кам вақт қўшишарди", — деди Тони Пулис.