Тимур Кападзе: "Олимпик" жамоасига бугунги каби ўйинлар тажриба бўлаяпти"

Ўйин ҳақида

- Биринчи навбатда "Динамо" жамоасини ғалаба билан табриклайман. Ўйин ҳақида айтадиган бўлсам, қийин учрашув ўтказдик. Иссиқ об-ҳаво туфайли биринчи бўлимда йигитлар қийинчиликка дуч келишди. Биз ҳам, рақиб ҳам кўп куч сарфладик. Афсус биринчи бўлим охирида гол ўтказиб юбордик. Умуман айтганда биринчи бўлимда йигитларнинг ҳаракатларидан қониқиш ҳосил қилдим.

"Динамо" жамоаси бугунги ўйинда яхши ҳаракат қилди. Уларнинг тайёргарлиги яхши бўлгани кўриниб турибди. Афсус стандарт вазиятдан гол ўтказдик, бу гол самарқандликларга ғалаба келтирди. Ўйин дуранг ёки бизни ғалабамиз билан тугаши ҳам мумкин эди. Омад "Динамо" томонида бўлди.

- Бугунги баҳс юқори темпда ўтди деб айтсак бўлади. Ёш футболчиларни кучли жамоалар босимига мослашиш жараёни қандай кечаяпти?

- Бу айни биз кутган жараён. Бизга шу каби босим керак. Олдимизда юксак вазифалар турибди. "Олимпик" жамоасига бугунги каби ўйинлар тажриба бўлаяпти. Ўйлайман-ки, бу каби беллашувлар йигитларга келажакдаги вазифалар учун пойдевор вазифасини ўтайди.

- Жисмоний жиҳатдан жамоангиз яхши кўринмади. Балки Украина сафари ўз таъсирини кўрсатгандир?

- Балки шунинг ҳам таъсири бордир. Сафар, йўл чарчоқлари таъсир кўрсатгандир. Бу ерда асосий урғуни об-ҳавога қаратган бўлардим. Биринчи бўлимда ўйин темпи яхши эди, катта куч айнан биринчи бўлимда йўқотилди. Йўл аломатлари балки сезилгандир. Захирадан тушган ўйинчилар ўйинни кучайтирдирди деб ўйлайман. Фожеа ясаш керак эмас, хато ва камчиликлардан хулоса чиқарамиз. Олдимизда "Нефтчи"га қарши баҳс кутиб турибди. Ундан кейин "Оқ-тепа", "Бухоро" каби жиддий жамоаларга қарши ўйинлар кутиб турибди.