Тимур Кападзе: "Натижа адолатли бўлди деб ўйлайман, ЖЧга чиққанимиздан сўнг ҳам бош мураббий бўлиб қолишга умид қиламан"

"Аввало, Эрон терма жамоасини жаҳон чемпионатига йўлланма олгани билан табриклайман ва уларга ушбу мусобақада муваффақият тилайман. Ўйин қизиқарли ва ҳаяжонли бўлди, иккала жамоа ҳам имкониятларга эга бўлди. Натижа адолатли бўлди деб ўйлайман. Эронни енгишимиз ҳам мумкин эди, аммо бу амалга ошмади. Энди биз кейинги ўйин ҳақида ўйлаймиз ва саралашдан ўтишга ҳаракат қиламиз.

Ушбу ажойиб ўйин учун шогирдларимга ва стадионга ташриф буюрган ўзбекистонлик мухлисларга миннатдорчилигимни билдираман. Ўзбекистон халқи жаҳон чемпионатига муносиб ва мен уларга дуолари учун ташаккур айтаман. Биз кейинги ўйинда керакли натижага эришишга ҳаракат қилмоқдамиз.

Ёдимда, 2018 йил саралаш босқичида Эронга ёш жамоа билан борганимиз. Рақибимиз ўша пайтда жаҳон чемпионатига жиддий тайёргарлик кўраётган эди. Бош мураббий Карлуш Кейруш эди. Мен ўша пайтдаги Эрон жамоасини ҳозирги жамоа билан таққосламоқчи эмасман.

Мухлисларнинг қўллаб-қувватлови ва яхши тилаклар учун яна бир бор миннатдорчилигимни билдираман. Жаҳон чемпионатига чиққанимиздан сўнг ҳам Ўзбекистон миллий терма жамоасининг бош мураббийи бўлиб қолишга умид қиламан", — деди Тимур Кападзе.