Темурхўжа Абдухолиқов: "Кўтарма пули борасида "олтин оралиқ"ни топиш керак"

Ушбу хабар чиққанидан бери бу мавзу кўпчиликнинг қизғин муҳокамасига сабаб бўлмоқда. Маълумки, аксар футболчилар бир жамоадан иккинчисига ўтганда янги клубидан кўтарма пули (бошқача айтганда, "подъёмний") олишади. Кўтарма пулларини қай тартибда бериш борасида аниқ қоида мавжуд эмас, бунда ҳар клуб ўз танлаган йўлидан келиб чиқиб иш тутади.

Агар кейинги йилдан футболчиларга бериладиган кўтарма пулларига чек қўйилса унда нима бўлади? Бу ҳақда бирданига фикр билдириш қийин ва нимадир гапиришдан олдин обдон бош қотиришга тўғри келади. Навбати билан бу борада кўпчилик мураббий ва футболчиларнинг фикрини бериб боришга ҳаракат қиламиз. Яқиндагина "Локомотив"га қайтган Темурхўжа Абдухолиқовнинг бу ҳақда фикри қуйидагича бўлди.

- "Энди бу ЎФА чиқарган қарор, шу боис мен фақат ўз фикримни билдиришим мумкин, холос. Футболчи юқори савияда максимум 10-15 йил ўйнаши мумкин. Меҳнатимиз қанчалик оғирлигини ўзингиз яхши биласиз. Футболчилар бир жамоа бўлиб машғулот ўтказишади, кейин худди ўзингизга ўхшаб тайёргарлик кўрган жамоага қарши майдонга тушиб ютишингизга тўғри келади".

- "Мен нима дейишим мумкин? Бизнинг чемпионатда ўзи шундоқ ҳам мисол учун Қатар ва Хитой билан солиштирганда катта пул айланмайди. Мен бу қарорга норозиман дея олмайман-у, лекин бу ҳақда чуқур ўйлаб кўриш, "олтин оралиқ"ни топиш керак деган фикрдаман. Балки кейинчалик шунинг устида бош қотиришар. Нима бўлганда ҳам қарорни ЎФА қабул қилади. Агар бу қарор ўз кучида қоладиган бўлса, футболчилар билан нима рўй беришини қишда кўрамиз. Лекин мен буни бир томонлама чиқарилган қарор деб ҳисоблайман", - дейди "темирйўлчилар" ҳужумчиси.

Х.Холиқов.