Таиланд бош мураббийи Ўзбекистон билан ўртоқлик учрашуви бўлишини тасдиқлади. Ўйин 30 дақиқалик 3 таймдан иборат бўлади

Йиғин давомида Таиланд терма жамоасига қарши ўртоқлик учрашуви бўлиб ўтади. Аслида биз 29 май куни Австралия термаси билан ўртоқлик учрашувида майдонга тушишимиз лозим эди. Лекин бу ўйин ўтказилмайдиган бўлди. Шу боис вакилларимиз 30 майда Таиландга қарши баҳс олиб боришади.

Қизиғи шундаки, Таиланд терма жамоаси 29 май куни Тожикистон билан ўйнайди. Эртаси куни эса биз билан. Демак, улар икки кунда иккита назорат баҳси ўтказишади. Таиланд терма жамоаси бош мураббийи Акира Нишино бу ҳақда шундай деди: 

- "Таиланд футбол ассоциацияга миннатдорчилик билдираман. Раҳбарият терма жамоа учун ҳамма қулайликларни яратиб беряпти. 30 май куни Ўзбекистон миллий терма жамоасига қарши майдонга тушамиз. Ўйин 30 дақиқалик уч таймдан иборат бўлади. Менга маълум қилишларича, ушбу ўртоқлик учрашуви The Sevens стадионида буткул ёпиқ тарзда кечади. Ўйлайманки, бу ўйин Индонезияга қарши баҳс олдидан жуда фойдали бўлади".