Суперлигада навбатдаги истеъфо “Бухоро”дами ёхуд “Қизилқум”?!

Бунга сабаб сифатида россиялик мураббий “бургутлар”нинг дастлабки уч турда 1 очко жамғарганини рўкач қилди. Бизнингча Хомяковни “Андижон”ни тарк этиши биргина бу сабаб билан боғлиқ  эмас. Гарчи жамоа “Локомотив” ва “Насаф” қарши кечган баҳсларда мағлуб бўлсада, мухлисларнинг жамоа ўйинидан кўнгли тўлаётганди. Футболчилар охиригача курашаётганини билдириб, бунда мураббийнинг қўли борлигига шубҳа билдиришмаётганди. Хуллас Суперлигадаги дастлабки истеъфо “Андижон”да юз берди. 

Узун қулоқ гап-сўзларга қараганда, яқин орада “Бухоро” ва “Қизилқум” жамоаларида ҳам бош мураббий ўзгариши кутилмоқда. Гап шундаки, чемпионатнинг дастлабки учта турида ўз дарвозасидан жавобсиз учтадан тўп ўтказиб юбориш орқали, мағлуб бўлган “Бухоро” клуб раҳбарияти тожикистонлик мураббийини ишдан бўшатмоқчи. Қишки селекция чоғида ўзи истагандек таркибни шакллантиришига шароит яратиб берган “Бухоро” раҳбарияти энди Муҳсин Муҳаммадиевни истеъфога чиқаришни ўйлаб турибди. Жамоа мутасаддилари бошқарув постига маҳаллий мутахассис Жамшид Саидовни олиб келишни режалаштирмоқда. Ишқибозларга яхши маълумки, Жамшид Жалолович 2019 йилдан буён “Андижон”да ёрдамчи мураббий сифатида фаолият юритиб келаётганди. Яқинда ушбу мутахассис ҳам Хомяков билан бирга ўз хоҳишига кўра, ариза ёзиб жамоа билан хайрлашишга қарор қилган. Бу бежиз эмасди албатта. Чунки Саидов “Бухоро” бош мураббийлигини олиш бўйича жамоа раҳбарияти билан деярл келишувга эришган. Йўқса, у иссиқ жойини совитмасди. Жамшид Саидов илгари “Бухоро”ни бошқарган ва ижобий натижаларни қайд этгани билан маҳаллий мухлисларни эътиборини тортади. Шунинг учун ҳам “Бухоро” мутасаддилари Саидовни яна бош мураббийликка қайтаришга қарор қилган кўринади. 

“Бухоро”нинг ён қўшниси бўлган Навоийнинг “Қизилқум” жамоасини ҳам ишлари яхши эмас. Гарчи Ҳамиджон Актамов бошқарувидаги жамоа дастлабки икки турни ўз майдонида ўтказган бўлсада, ўз мухлислари қаршисида қимматли очколарни бой бериб қўйди. Фақат учинчи турда сафарда “Машъал” билан дуранг қайд этди. Олинган маълумотларга қараганда, яқин орада нафақат бош мураббий лавозимида балки “Қизилқум” клуби тизимида сезиларли ўзгаришлар бўлиши кутилмоқда. Бошқарув постига яқиндагина “Андижон” билан хайрлашишга қарор қилган Александр Хомяков номзоди кўриб чиқилмоқда. Ундан ташқари юртимизда “Машъал”, “Насаф” ва АГМК клубларидаги  фаолияти орқали мухлисларга яхши таниш бўлган Виктор Кумиков ҳам “Қизилқум” клубида пайдо бўлиб қолиши ҳеч гап эмас. Воқеалар ривожи қандай тус олишини эса албатта кўрсатади. 

Дарвоқе, Александр Хомяков “Андижон”дан кетиши биланоқ, унга бўлган “Совчилар” кўпайиб кетганини ҳам алоҳида эътироф этиш лозим. Россиялик мутахассисга “Навбаҳор” вакиллари ҳам алоқага чиқиб, клуб тизимида ишлаш бўйича таклиф қилган. 

Шунингдек чемпионатнин дастлабки учта турида атига 1 очко жамғарган “Сўғдиёна” клубида ҳам яқин орада бош мураббий ўзгариши кутилмоқда. Жиззахликлар раҳбарияти ҳам Хомяковга таклиф билан чиққан. Александр Андреевич, ҳозир олдида турган таклифларни атрофлича ўрганиб чиқмоқда ва катта эхтимол билан келаси ҳафтадан янги жамоасида иш бошлайди.