Сульшер Рэшфорднинг жароҳати ҳақида: "Менимча у "Ливерпуль" билан ўйингача тикланолмайди"

22 ёшли футболчи Англия кубоги доирасида "Вулверхэмптон"га қарши беллашув (1:0)нинг 64-дақиқасида захирадан майдонга тушганди. Аммо, бир неча дақиқа ўтиб Мэтт Доэртининг қўполлигидан сўнг белини ушлаб чимга ўтириб олганди. Маркус баҳсни давом эттира олмаган ва 79-дақиқада алмаштирилганди.

"Нимадир дейиш қийин. Бу ерда бир неча ҳафта олдин Магуайр билан содир бўлган ҳолат такрорланмоқда. У кун давомида яна бир нечта тиббий текширувдан ўтади. Ўйлашимча, у тикланишга улгурмаса керак. Лекин, олдинда ҳали 48 соат бор", - дея Сульшернинг сўзларини келтирди МЮ матбуот хизмати.

Эслатиб ўтамиз, "Манчестер Юнайтед" АПЛ 23-тури доирасида "Ливерпуль" меҳмони бўлади. "Энфилд" мезбонлик қиладиган учрашув 19 январь (якшанба) куни соат 21:30да старт олади.

Англия Премьер-лигаси турнир жадвали >>>>> АПЛ