Сирож Ҳамроев: “Хўжанд” Суперкубокни ютиб тарихга кириши мумкин эди”

Пойтахт жамоасининг ғалабаси билан тугаган баҳсдан сўнг меҳмон жамоа сафида ҳаракат қилган ўзбекистонлик Сирож Ҳамроев ўйин борасидаги фикрларини билдирди.

“Биринчи бўлимда жамоамиз ажойиб ўйин кўрсатди. Бизга суюкли мухлисларимиз етишмади. Билсангиз, “Хўжанд” жамоасининг бетакрор ва олийжаноб ишқибозлари бор. Улар ҳар доим сафарда ёки уйда биз билан бирга бўлишади. Гарчи, бугун стадионга киритилмаган бўлса ҳам қалбан уларнинг мададини сезиб турдик.

Ҳозирда бутун дунё битта касаллик билан курашмоқда. Бундай пайтда биринчи ўринда инсон соғлиғи туради. Қисқа қилиб айтганда бизнинг ўн иккинчи ўйинчиларимиз мухлисларимизнинг ҳайқириқлари камлик қилди.

Натижани сақлаб қолиш сўнги дақиқаларда диққатимизни йўқотдик. Бироз эътиборлироқ бўлишимиз керак эди. Суперкубокни ютиш орқали тарихга киришни истаган эдик. Клуб шу вақтгача бирон маротаба ушбу совринга эга чиқмаган экан. Мана яқин кунларда ички чемпионат баҳслари ҳам бошланади. 8 апрель куни Помирнинг ЦСКА жамоасига қарши ўйин билан мавсумни бошлаймиз”, - дейди ўзбекистонлик футболчи.


Абдулазиз Искандаров ёзиб олди.