Шуҳрат Мақсудов: "Кимгадир шу нарса керакки, гап-сўз тарқатяпти"

Жамоа аъзолари бугун "Металлург"га қарши ўртоқлик учрашувида майдонга тушади. Биз мазкур ўйин олдидан "Бунёдкор" бош мураббийи Шуҳрат Мақсудовга бир нечта саволлар билан юзландик.

- Жамоанинг натижалари, турнир жадвалида эгаллаб турган ўрни яхши эмас...
- Ёш футболчиларимиз ўйинни яхши олиб боришмоқда. Қайсидир ўйинларда омад етишмаяпти. Гоҳида тўп дарвозага киришни истамаяпти. Ўтган турларни ёмон ўтказдик, демаган бўлардим. Фурсатдан фойдаланиб "Бунёдкор" клуби раҳбарияти ва бош ҳомийимизга, ҳамда мухлисларга бизга ишонч билдираётгани учун миннатдорчилик билдираман. Суперлигадаги танаффус бу - кўпга келган тўй.

- Олдинда терма жамоамизни масъулиятли учрашувлар кутмоқда. Барибир истаймизми йўқми асосий рақиб Саудия Арабистони. 2015 йил Осиё кубогида Миржалол Қосимовнинг мураббийлар штабида бу терма жамоага қарши баҳсда иштирок этгансиз. Демак уларнинг кучи ва имкониятларидан хабадорсиз...
- Ушбу баҳсдан сўнг орадан 6 йил ўтди. Кўп нарса ўзгарди. Лекин Саудия Арабистони жиддий бўлиб қолган. Терма жамоамизга омад тилаб қоламан. Мураббийлар штабидан тортиб, футболчиларгача юртимизга ёруғ юз билан қайтишларини чин дилдан тилайман. Ўйлайманки, ҳаммаси яхши бўлади.

- Сўнгги пайтларда сиз томонингизга бўлаётган танқидларга муносабатингиз...
- Кимгадир шу нарса керакки, гап сўз тарқатяпти. Шу пайтгача нечта тур ўтган бўлса, мухлислар ёки ҳакамлар билан тортишганим йўқ. Қаердан бундай гаплар чиқяпти ҳайронман. Афсуски, шундай одамлар бор. Инсоф берсин, деб қоламан.

Абдулазиз Искандаров суҳбатлашди