"Штутгарт" спорт директори: Вальдемар Антон Евро-2024дан кейин жамоадан кетади

Германия терма жамоаси ҳимоячиси Вальдемар Антон Евро-2024 якунланганидан кейин ҳам "Штутгарт"га қайтмайди. Бу ҳақида клуб спорт директори Фабиан Вольгемут пайшанба кунги машғулот вақтида маълум қилди.

Маълум вақтдан буён "Штутгарт" 28 ёшли ҳимоячиси билан хайрлашиши ҳақида хабарлар бор эди. Баъзи манбалар Антон фаолиятини Дортмунднинг "Боруссия"сида давом эттирмоқчилигини таъкидламоқда. Бироқ ҳозирча бу борада расмий маълумот йўқ ва унинг кейинги жамоаси борасидаги савол очиқ қолмоқда. Унинг трансфери эҳтимолий харидорга тахминан 22,5 млн еврога тушиши кутилмоқда.

Қайд этиш лозим, Вальдемар ҳозирда Германияда давом этаётган Евро-2024нинг 1/8 финал босқичида захирадан майдонга туширилди ва қитъа чемпионатида дебют қилди.  

Эслатиб ўтамиз, Вальдемар Антон 2020 йилдан буён "Штутгарт" шарафини ҳимоя қилиб келади. Клуб либосида 141 ўйинда 4 та гол урган ва 8 та голли узатма етказиб беришга муваффақ бўлган.