Шри-Ланка бош мураббийи: "Ўзбекистоннинг ўйинини Таиландникидан 10 фоиз юқорироқ баҳолайман"

Баҳсдан кейин Шри-Ланка устози Ҳассан Руми фикрлари билан ўртоқлашди.

"Ушбу халқаро турнир орқали йигитлар тажриба орттиришади. Улар 90 дақиқа давомида қўлидан келганини бажаришди. Биз ФИФА рейтингида 205-ўриндамиз, лекин бу аҳамиятга эга эмас. Рақиб дарвозасини ишғол қилганимизда ҳаммаси бошқача бўларди. Кейинги баҳсда бошқача ўйин намойиш этамиз. Ўзбекистон кучли ўйинчилардан таркиб топган экан. Мураббий сифатида шуни айтаманки, ривожланишдан тўхтаб қолмаймиз", – деди мураббий.

- Келгуси баҳсга қандай мақсадларингиз бор?

- Ҳар бир жамоага алоҳида режа тузганмиз. 

- Гуруҳ фаворитлари ўртасидаги фарқ қай даражада?

- Иккала жамоа ҳам кучли ўйин кўрсатади, бироқ Ўзбекистоннинг ўйинини 10 фоиз юқорироқ баҳолайман.

- Жамоа Осиё Кубогига чиқиш имкониятини деярли йўқотди. Гол ўтказиб юборгач, нега шогирдларингиз ҳужумга ўтиш орқали таваккал қилмасдан, ҳимояланишда давом этди?

- Рақиб бунга йўл қўймади, биз имкониятимиз борича вазиятлар яратишга ҳаракат қилдик.