"Шўртан" бош мураббийи Асрор Алиқулов истеъфога чиқарилди

Хабарингиз бўлса керак, пайшанба куни «Оқ бўрилар» ўз майдонида чемпионатнинг 8-туридан ўрин олган «Машъал»га қарши баҳсда рақибига имкониятни бой бериб қўйди.

Шу боис бугун жамоанинг Ғузор шаҳридаги қароргоҳида навбатдан ташқари йиғилиши бўлиб ўтди. Уни клуб вице-президенти Виктор Алешниковнинг ўзи олиб борди. Жамоанинг сўнгги пайтларда қимматли очколарни бой бераётгани раҳбарият ва мухлисларни ташвишга солиб келаётганди. Шунинг учун кун тартибидан ўрин олган асосий масала - мураббийлар штабининг фаолиятини кўриб чиқиш эди. Якунда бош мураббий Асрор Алиқулов раҳбарият томонидан истеъфога чиқарилди. Шунингдек унга яқиндан ёрдам бериб келган мураббийлар - Ботир Қодирқулов билан Акмал Саидқуловга ҳам чиқиш эшиклари кўрсатилди. Ўз навбатида клуб раҳбарияти ушбу мураббийларнинг «Шўртан» ривожи учун қилган мехнатларига миннатдорчилик билдириб дўстона равишда хайрлашди.

Эндиликда жамоани вақтинчалик Баҳодир Шоймардонов бошқариб турадиган бўлди. Унга дарвозабонлар мураббийи Эркин Мирзаев кўмаклашади. Шоймардонов бунга қадар «Шўртан»да техник-директор лавозимида ишлаб келаётганди. Душанба куни ғузорликларни Фарғонада «Истиқлол»га қарши ўйинга Шоймардонов олиб тушади. Клуб раҳбарияти бош мураббийликка ҳозирда бир қатор номзодларни кўриб чиқмоқда. Яқин орада шулардан бири билан расмий тарзда музокара ўтказилиб, янги бош мураббийни кенг оммага таништиради.