Шавкат Юсупов: "Локомотив"да Суперлига савиясидаги ўйинчилар йиғилган"

"Бугун ғалабани тантана қилишни хоҳлагандик, афсуски, бунга эришолмадик. Стадион очилиши муносабати билан мухлисларга ҳужумкор ўйин намойиш этиб бермоқчи эдик. Ғалаба орқали уларга яхши кайфият улашмоқчи бўлдик. Хатоларимиз туфайли рақиб бизни жазолади. Голли вазиятлар бўлди, аммо ундан фойдаланолмадик", – деди Юсупов.

- Нима деб ўйлайсиз, тажриба ютдими ёки "Локомотив" ғалабани тўғри танланган тактика эвазига қўлга киритдими?

- "Локомотив" жамоасида Суперлига савиясидаги ўйинчилар йиғилган. Жамоамиз футболчиларининг ҳар бирига раҳмат айтаман, улар борларини беришди. Энди кейинги ўйинлар учун куч йиғамиз ва хатолардан тўғри хулоса чиқаришга ҳаракат қиламиз. 

- Жамоангиз ҳужум чизиғи кўрсатган ўйинга қандай баҳо берасиз?

- Ҳужумда бир қатор вазиятлар яратдик. Омад етишмади. Қанотлар орқали яхши ҳужумлар уюштирдик, аммо сўнгги зарбада оқсоқланиш кузатилди.

- Сизни қониқтирган ҳолат?

- Жамоамиз йигитлари гол уриш учун астойдил интилгани мени қониқтирди. Кейинги учрашувларда ҳам шундай шашт билан ўйнашларини кутамиз.

-  Кейинги тур Нукуснинг "Арал" жамоасига қарши кечади. Бу борада қандай фикрдасиз?

- "Арал" жамоаси турнир жадвалида 3-ўринда кетмоқда. Уларнинг ўйинига мухлислар кўп киради. Ажиотаж бўлади. Худо хоҳласа, ғалабани кўзлаб сафарга отланамиз.