Шавкат Саидов: “Обод” ҳали кўп жамоаларнинг курагини ерга текказишига ишонаман”

- “Обод” жамоаси билан учрашув оғир кечишини билгандик. Боиси бу жамоага қарши мавсум арафасида иккита назорат учрашувида майдонга тушиб иккаласида ҳам имкониятни бой бергандик. Бундан ташқари пойтахтликларнинг бир қатор ўйинларини кўриб чиқдик. Уларнинг ўзига хос, шижотли ҳаракатларини кузатиб, тўғриси “Сўғдиёна”, “Шўртан” каби рақибларимиздан-да ортиқроқ чўчидик. Худога шукур, бугун болалар ўз зиммаларидаги вазифани шараф билан уддалашди. Юзимиз ёруғ бўлди. Бунинг учун футболчиларимизнинг барчасига миннатдорчилик билдираман. Қолаверса, бутун ўйин давомида бизни тинимсиз қўллаб-қувватлаб турган мухлисларимизни ҳам иродали ғалаба билан табриклайман.

Учрашувдан олдин мураббийларимиз “Обод” футболчиларининг олис масофадан кучли зарбалар бериши борасида кўрсатма бергандик. Айниқса Санжар Тўрақуловни ёпиш ҳақида таъкидлагандик. Бироқ биринчи дақиқадаёқ унинг дарвозани нишонга олиб қолишини тўғриси футболчиларимиз кутишмадими, гол ўтказиб юбордик. Зафар Сафоев ҳам ҳимоячилар панасида тўпнинг йўнилишини кеч пайқаб қолди.

“Обод” жаомасининг уйдаги ва сафардаги ўйинларини кузатиб, футболимиз ўзига хос иштиёққа эга клубга эга бўлаётганлигига амин бўлгандик. Бугун бу яна бир марта ўз исботини топди. “Обод” ҳали кўп жамоаларнинг курагини ерга текказишига ишонаман. Олий лигада жон сақлаб қолиш у ёқда турсин, бемалол кучли ўнталикка киришга қодир жамоа деб ўйлайман. Жамоанинг мураббийлар штаби ҳам тўғри йўлни танлашган ва бу йўлда мен уларга омад ёр бўлишини тилайман”, - дейди Шавкат Саидов.

"Металлург" матбуот хизмати