Шакири: "Бавария" - "Ливерпуль" тўқнашуви мен учун ҳиссиётли ўтадиган учрашувга айланади"

Ҳозирда "Ливерпуль" шарафини ҳимоя қилаётган футболчи 2015 йил январь ойидан бери биринчи марта Fußball Arena München стадионига ташриф буюради. Ўшанда Шакири "Бавария" клубидан Англиянинг бошқа бир жамоаси "Сток Сити"га бориб қўшилганди. 

"Бавария" - "Ливерпуль" тўқнашуви мен учун ҳиссиётли ўтадиган учрашувга айланади. Лекин, мен у ерга боришни ва ғалаба қозонишни хоҳлайман, - дея швейцариялик ўз фикрларини билдириб ўтди. 

Шунингдек, Жердан Шакири устози Юрген Клопп ҳақида ҳам ўз фикрлари билан бўлишди.

"Мураббийимиз Бундеслигани, айниқса "Бавария" клубини "беш қўлдек" билади. У биз яхши ўйин намойиш этишимиз учун тўғри маълумотларни етказиб беради ва уларга қарши қандай ўйнаш кераклигидан жуда яхши хабардор", - деди ЕЧЛ 2013 йилги мавсумда "Бавария" билан мусобақа ғолиби бўлган Шакири. 

Маълумот учун, "Ливерпуль"нинг 23-рақам соҳиби фаолияти давомида ЕЧЛда 29 учрашувда кўриниш берган ва 3 марта тўп киритган. Жорий мавсум "Црвена Звезда" жамоасига қарши ўйинда (4:0) мерсисайдликлар сафида дебют қилди.