Шакер Зуаги ўз голини нега стул атрофида нишонлади?

Сардор Рашидов, Темур Аюпов ва Сардор Собирхўжаевнинг голларидан сўнг “қалдирғочлар”нинг тўртинчи голига Шакер Зуаги муаллифлик қилди. Тунислик ярим ҳимоячи ўз голини ноодатий тарзда нишонлади. Яъни у майдон ташқарисида ўтирган бетараф шифокорлар стулини майдонга яқин жойга олиб келиб, жамоадошлари билан унинг атрофида айланган ҳолда нишонлади. Ушбу ҳолат кўпчиликда қизиқтириб қўйди. Гол нега айнан шундай нишонланганини футболчининг ўзига мурожаат этган ҳолда билиб олдик.

- “Машъал”га қарши ўйиндан бир кун аввал руҳшунос биз билан машғулот ўтказди. Бир соат давом этган назарий машғулотда руҳшуноснинг бир гапи нафақат менга балки бошқа жамоадошларимга ҳам таъсир қилди. Яъни инсон ўз кучига ишониши учун бир жойда муқим ўрнашиши ва ўз ишини мукаммал бажаришда давом эттириши лозим экан. Руҳшуноснинг ушбу гапидан кейиноқ жамоадошларимга агар эртага гол урсам стул атрофида айланиб, нишонлаймиз дегандим. Сўнгги ўйинлардаги муваффақиятсизликлардан кейин ўз кучимизга яна ишона бошладик. Ўйлайманки, нохуш кунларимиз ортда қолди. Бундан буёғига ғалабалар қозониб, мухлисларимизни хурсанд этишимиз ва мусобақа жадвалида юқорироққа кўтарилишимиз керак, - дейди Шакер Зуаги.